მალდივის ნაკრების თავკაცი: „კვარას ჩემს გუნდში სიამოვნებით წავიყვანდი“

ფრანჩესკო მორიერო იტალიელი ფეხბურთელია, რომელსაც „ლეჩეში“, „ნაპოლიში“, „რომასა“ და „ინტერში“ უთამაშია. ამჟამად, იგი მალდივის საფეხბურთო ნაკრების მთავარი მწვრთნელია და IL Mattino-ს საინტერესო ინტერვიუ მისცა, რომელშიც ხვიჩა კვარაცხელიაზეც ისაუბრა.

„ნაპოლის რომელი ფეხბურთელის ნატურალიზაციას მოვახდენდი და რომელს წავიყვანდი მალდივის ნაკრებში სათამაშოდ? რა თქმა უნდა, ხვიჩა კვარაცხელიას. ეს ბიჭი მაგიჟებს და მასში საკუთარ თავს ვხედავ, რადგან ყოველთვის ცდილობს, რაღაც შექმნას. კითხვის ნიშნებს არასდროს ტოვებს და ყოველთვის გადამწყვეტია. მისნაირი ფეხბურთელი დიდი ხანია, იტალიაში არ მინახავს. სერია A-ში, ლეგიონერებისთვის სადებიუტო წელი ურთულესია, მაგრამ კვარამ ადაპტაცია უსწრაფესად გაიარა. ხვიჩა მე მგავს, მაგრამ ფიზიკურად უფრო ძლიერია.

რას წარმოადგენს ნაპოლი? პარტენოპეის შეუძლია, ძალაუფლების პოლუსი სამხრეთში გადაიტანოს. სპალეტის მიერ გაწეულ სამუშაოს შედეგი მოაქვს და ნაპოლი ღიმილით თამაშობს, ეს კი დიდი ხანია სერია A-ს დაკარგული ჰქონდა“.

შეგახსენებთ, რომ ქართველი ფეხბურთელის გუნდის მომდევნო გაჩერება „ლეჩეა“, რომელსაც პარასკევს დაუპირისპირდება, 12 აპრილს კი ჩემპიონთა ლიგის მეოთხედფინალი და „მილანთან“ გასამართი მატჩი ელის.