გველები გასახდელში, ვირთხები მანქანაში - ტროი დინის გიჟური ისტორიები

ინგლისელმა ფეხბურთელმა, ტროი დინიმ Dail Star-ს ინტერვიუ მისცა და „უოლსოლში“ გატარებული პერიოდი გაიხსენა, რომლის ღირსებას 2006-დან 2010 წლამდე იცავდა. დინიმ გულშემატკივრებს გიჟური ისტორიები გაუზიარა და ყოფილი თანაგუნდელების ბოროტ ხუმრობებზე ისაუბრა.

„უოლსოლში ბევრი რამ იყო, რასაც დღესდღეობით ვერ შეხვდებით და ერთმანეთს ხშირად ვეხუმრებოდით. სტივენ ჯერარდის ბიძაშვილი, ენტონი ჯერარდი კარგი ადამიანია, მაგრამ ნამდვილი გიჟია. მახსოვს, ერთ დღეს, გასახდელში ორი ცოცხალი გველი შემოუშვა და კარი ჩაგვიკეტა, რადგან ეგონა, ეს სასაცილო იქნებოდა.

როგორც იცით, გველების გამოსაკვებად გაყინულ ვირთხებს იყენებენ და მაიკლ რიკეტსმა გადაწყვიტა, გაყინული ვირთხა ყველა თანაგუნდელის ჩანთაში ჩაედო. წარმოიდგინეთ, ვარჯიშის შემდეგ, ჩანთას ხელს ჰკიდებ, რათა აბაზანის გელი ამოიღო და მის ნაცვლად, დიდი და მსუქანი ვირთხა გხვდება. სხვათა შორის, ჩანთა არ მქონდა, რადგან ღარიბი ვიყავი და მეგონა, რომ რიკეტსის ხუმრობას გადავურჩი, თუმცა ძალიან შევცდი. ვარჯიშის შემდეგ, დედაჩემის Ford Focus-ში ჩავჯექი, რათა სახლში წავსულიყავი და მგზავრის სავარძელზე ვირთხა დავინახე, რომელსაც ღვედი ეკეთა. ბრწყინვალე ხუმრობა იყო, მაგრამ გული გამისკდა, როცა ვირთხა დავინახე“.

შეგახსენებთ, რომ დინი 2021 წლიდან „ბირმინგემის“ ღირსებას იცავს და „ლურჯების“ რიგებში 52 მატჩი აქვს ჩატარებული. მის ანგარიშზე 11 გოლია.