FICHAJES: „მამარდაშვილის გაყიდვა ვალენსიასთვის ერთ-ერთი გამოსავალია“
გუშინ ესპანურ მედიაში დაიწერა, რომ „ვალენსია“ გიორგი მამარდაშვილის გაყიდვით ფინანსურ პრობლემებს გადაჭრიდა და ამის შესახებ ჩვენც შეგატყობინეთ.
დღეს ამ ინფორმაციას უკვე გავლენიანი ესპანური სააგენტოებიც ავრცელებენ და სანდო წყაროებზე დაყრდნობით წერენ, რომ „ღამურების“ ხელმძღვანელებს ქართველი მეკარის გაყიდვა ფაქტობრივად გადაწყვეტილი აქვთ.
ერთ-ერთი ბოლო სააგენტო, რომელმაც ამის შესახებ დაწერა, გავლენიანი Fichajes.com-ია. სტატიაში ვკითხულობთ, რომ „ვალენსიას“ სასწრაფოდ სჭირდება ფულის გამომუშავება, რომ მიმდინარე ვალები დაფაროს, მამარდაშვილი კი მთავარ იმედად მოიაზრება.
რას წერს FICHAJES-ი:
თუ ამჟამინდელი „ვალენსიას“ სასიცოცხლოდ მნიშვნელოვან მოთამაშეებზე ვისაუბრებთ, ეს ნამდვილად გიორგი მამარდაშვილი იქნება. ქართველ მეკარეზე მენეჯმენტი ერთ-ერთ ყველაზე დიდ იმედს ამყარებს, რადგან მისმა საბაზრო ღირებულებამ საგრძნობლად მოიმატა. როდესაც „მესტალიაზე“ გადმოვიდა, მისი თავდაპირველი ღირებულება მხოლოდ 3 მილიონი ევრო იყო, ზაფხულში კი მისმა გაყიდვამ შესაძლოა 25 კილოგრამზე მეტი წონის მოგება დატოვოს. სწორედ ამით აპირებს პიტერ ლიმი და მისი გუნდი სარგებლობას.
სხვადასხვა საერთაშორისო აგენტთან საუბრის შემდეგ შევძელით გაგვერკვია, რომ მამარდაშვილის მიმართ საერთაშორისო ბაზარზე ინტერესი საკმაოდ მაღალია. ამას ის გარემოება განაპირობებს, რომ „ვალენსიას“ სპორტული მდგომარეობის მიუხედავად ქართველი მეკარე მაინც ყველა შეხვედრაში ახერხებს თავის გამოჩენას.
„ვალენსიას“ სასწრაფოდ სჭირდება ფულის გამომუშავება, მამარდაშვილი კი ამისთვის ერთ-ერთი ყველაზე ღირებული ვარიანტია. ჯერჯერობით, მას ევროპაში თამაშის კონკრეტული ვარიანტი არ აქვს, მაგრამ მისდამი ინტერესი ნამდვილად დადასტურებულია და მას ზაფხულში „მესტალიასთან“ დამშვიდობება მოუწევს.
ყველაზე დიდ ინტერესს პრემიერ ლიგის გუნდები იჩენენ, თუმცა არსებობს მადრიდის „ატლეტიკოს“ ვარიანტიც იმ შემთხვევაში, თუ გუნდს იან ობლაკი დატოვებს.
შეგახსენებთ, რომ გიორგი მამარდაშვილმა „ვალენსიას“ შემადგენლობაში ყველა ტურნირზე 24 მატჩი ჩაატარა და 28 გოლი გაუშვა, 5 შეხვედრაში კი კარის მშრალად შენახვა შეძლო.
ქართველი მეკარე Transfermarkt.org-ზე 25 მილიონ ევროდ არის შეფასებული, თუმცა ვრცელდება ინფორმაცია, რომ ზაფხულის სატრანსფერო ფანჯარაზე კლუბი მის სანაცვლოდ მინიმუმ 80 მილიონ ევროს მოითხოვს.
