ვალენსია მამარდაშვილის გაყიდვას აპირებს - მისი შემცვლელიც შერჩეული ჰყავთ

ესპანურ პრესაში გიორგი მამარდაშვილის მომავალთან დაკავშირებით, საინტერესო ინფორმაცია გავრცელდა. El Gol Digital-ი წერს, რომ „ღამურებს“ ფინანსური პრობლემები აქვთ და რამდენიმე ფეხბურთელის გაყიდვა გადაწყვიტეს, რომელთა შორის „მამარდაცაა“.

„კლუბის ეკონომიკური მდგომარეობა ძალიან მძიმეა.სწორედ ამიტომ, ვალენსია გამოსავალს ეძებს, რომელიც საუკეთესო ფეხბურთელების გაყიდვაზე გადის. ღამურებს ფინანსური კრიზისი აქვთ და სიტუაციის გამოსწორებას მამარდაშვილის გაყიდვით აპირებენ. გიორგი მნიშვნელოვანი ეკონომიკური აქტივია და მის გარდა, შესაძლოა, უგო გილამონი, ხოსე ლუის გაიაი და იუნუს მუსა გაასხვისონ. ამ ფეხბურთელებს ცნობილი კლუბები აკვირდებიან და მათი წასვლა ვალენსიას დიდ თანხებს მოუტანს“, - წერს ესპანური გამოცემა.

El Gol Digital-ის მიხედვით, „ვალენსიას“ მამარდაშვილის შემცვლელიც შერჩეული ჰყავს. „ღამურები“ თავიანთი ყოფილი ფეხბურთელის, სანტიაგო კანისარესის შვილის, ლუკას კანისარესის გადაბირებას აპირებენ. „ღამურები“ მზად არიან, მას შანსი მისცენ და ეს იმ შემთხვევაშიც მოხდება თუ გიორგი გუნდში დარჩება.

ცნობისთვის, მამარდაშვილმა ლა ლიგის მიმდინარე სეზონში 20-ვე ტურში სასტარტოში ითამაშა. კარი მშრალად მხოლოდ სამ შეხვედრაში შეინახა, თუმცა გუნდი გოლისგან ბევრჯერ იხსნა. საქართველოს ეროვნული ნაკრების ფეხბურთელმა ესპანეთის თასის სამ მატჩში ითამაშა, გოლი ორ შეხვედრაში არ გაუშვია.