Gazzetta: ტურინში, კვარას მიმართ სინანულის გრძნობა უფრო იზრდება

იტალიის სერია A-ს მე-18 ტურში ტურინის „იუვენტუსთან“ საოცარი თამაშის შემდეგ, იტალიურ მედიაში აქტიური განხილვის თემაა ხვიჩა კვარაცხელიას ტურინის „იუვენტუსში“ არშემდგარი ტრანსფერი. წამყვანი სპორტული სააგენტოები აქტიურად იხსენებენ 2021 წლის პერიოდს, როდესაც ტურინელებმა ქართველი ფეხბურთელის ყიდვაზე უარი თქვეს, მიზეზად კი „რუბინის“ მიერ მოთხოვნილი საფასური სახელდება, რომელიც 20 მილიონ ევროს შეადგენდა.

პრესტიჟულმა იტალიურმა გაზეთმა, la Gazzetta dello Sport-მა ორი წლის წინანდელი ამბები გაიხსენა.

რა წერია სტატიაში:

ტურინელთა ბანაკში, პარასკევის მატჩის შემდეგ ხვიჩა კვარაცხელიას მიმართ სინანულის გრძნობა კიდევ უფრო იმატებს. ქართველი ფეხბურთელი 2021 წელს ნამდვილად ახლოს იყო „იუვენტუსში“ გადასვლასთან, თუმცა ტრანსფერი გარკვეული მიზეზების გამო ვერ შედგა.

ქართველისადმი პირველი ინტერესი ჯერ კიდევ მაურისო სარის სეზონიდან თარიღდება. მაშინდელი სპორტული დირექტორი, პარატიჩი აქტიურად აკვირდებოდა კვარაცხელიას, შემდეგ სეზონში კი პირლომ კირეზასთან ერთად სცადა მისი დამატება. 2021 წლის გაზაფხულზე „იუვენტუსს“ სურდა „ბაიერნისთვის“ და ინგლისური კლუბებისთვის დაესწრო. ქართველი ტურინშიც ჩავიდა და შავ-თეთრების ბაზასაც ესტუმრა.

მაგრამ საბოლოოდ კვარაცხელიას „იუვეში“ ტრანსფერი ვერ შედგა. საინტერესოა, რატომ არ გააფორმეს კონტრაქტი, მხოლოდ ფასშია საქმე? 2021 წლის გაზაფხულზე „იუვენტუსში“ საფუძველი ჩაეყარა ახალ რევოლუციას. პარატიჩი წავიდა და მის მაგივრად ჩერუბინი მოვიდა. შეიცვალა პრიორიტეტები და კლუბის სტრატეგიაც, მათ შორის ხვიჩა კვარაცხელიაზეც და გუნდმა მისი ყიდვა გადაიფიქრა.

შეგახსენებთ, რომ მედიაში აქტიურად ვრცელდება ინფორმაცია, რომ „იუვენტუსმა“ ყაზანის „რუბინის“ მიერ მოთხოვნილი 20 მილიონი ევროს გადახდაზე უარი განაცხადა და ხვიჩას ტრანსფერიც სწორედ ამის გამო ჩაიშალა. ამასთან დაკავშირებით, პარასკევის მატჩის შემდეგ „რუბინმა“ ტურინელებს დამცინავი ვიდეოც მიუძღვნა.

მიმდინარე სეზონში, ქართველმა ფეხბურთელმა „ნაპოლის“ შემადგენლობაში ყველა ტურნირზე 20 მატჩი ჩაატარა, რომელშიც 9 გოლი გაიტანა და 10 საგოლე გადაცემას შეასრულა.