„ორი პენალტი უნდა დაენიშნათ“ - არტეტა მსაჯობით იმედგაცრუებულია

ინგლისის პრემიერ ლიგის მე-19 ტურში ლონდონის „არსენალმა“ საკუთარ მოედანზე „ნიუკასლს“ უმასპინძლა და ფრედ, 0:0 ითამაშა.

შეხვედრის დასრულების შემდეგ, ლონდონური კლუბის მთავარმა მწვრთნელმა, მიკელ არტეტამ განვლილი მატჩი შეაფასა და განაცხადა, რომ არსენალის სასარგებლოდ მსაჯს ორი პენალტი უნდა დაედო. ესპანელი სპეციალისტი იმედგაცრუებას ვერ მალავდა.

რა თქვა არტეტამ:

ძალიან ამაყი ვარ ჩემი ფეხბურთელებით. ვამაყობ იმით, თუ როგორ ვითამაშეთ, როგორ ვდომინირებდით და თამაშის გაკონტროლებას ვცდილობდით. შეხვედრის ბოლოსკენ შეტევაში ნაპერწკალი გვჭირდებოდა და ეს მივიღეთ კიდეც, თუმცა შემდეგ ორი აშკარა ჯარიმა არ დაგვინიშნეს.

დიახ, ნამდვილად იყო ორი პენალტი დასანიშნი, ყველაფერი მარტივადაა. ვამბობ იმას, რაც ვნახე, ორი სკანდალური პენალტი. ამის მიუხედავად, მაინც ვამაყობ იმ საქმით, რომელიც მოედანზე შევასრულეთ.

ამ თამაშის მოგება გვინდოდა, მაგრამ ფრედ დავასრულეთ. ბოლო მესამედში რაღაც უკეთესი უნდა გაგვეკეთებინა. საბოლოოდ, ამ შეხვედრის მოსაგებად ეს ორი პენალტი დაგვაკლდა.

19 ტურის შემდეგ „არსენალი“ პრემიერ ლიგის სატურნირო ცხრილში 44 ქულით პირველ ადგილზე იმყოფება და უახლოეს მდევარ „მანჩესტერ სიტის“, რომელსაც 1 თამაშით ნაკლები აქვს ჩატარებული 8 ქულით უსწრებს.