„ჩვენი ხასიათი ვაჩვენეთ“ - შენგელიას ვირტუს ბოლონიამ მაკაბი დაამარცხა
თორნიკე შენგელიას „ვირტუს ბოლონიამ“ ევროლიგის მიმდინარე გათამაშებაში მე-6 გამარჯვება მოიპოვა. ქართველი კალათბურთელის გუნდმა მე-14 ტურში, „მაკაბის“ წინააღმდეგ იასპარეზა და მეტოქეს დაძაბულ ბრძოლაში სძლია - 78:73.
VITTORIA ⚪️⚫️
— Virtus Segafredo Bologna (@VirtusSegafredo) December 16, 2022
La Virtus con un ultimo quarto di carattere vince con il Maccabi e guadagna la seconda vittoria della settimana in Eurolega ✌????????
???? Teodosic 15, Hackett 15, Shengelia 12 #AmoreInfinito #EveryGameMatters pic.twitter.com/9mg0rXUALD
საქართველოს საკალათბურთო ნაკრების კაპიტანმა მატჩი ძირითად შემადგენლობაში დაიწყო და პარკეტზე 27 წუთი და 46 წამი გაატარა. ამ დროში, შენგელიამ 12 ქულა, 2 მოხსნა, 1 შედეგიანი გადაცემა და 2 ჩაჭრა მიითვალა. თოკომ 4-დან 2 ორქულიანი ჩააგდო და 8-დან 8 საჯარიმო გამოიყენა.
„ბოლო ორ შეხვედრაში ჩვენი ხასიათი ვაჩვენეთ. ამ მატჩამდე, სერია A-ში და ევროლიგაში დასანანი მარცხები გვქონდა, მაგრამ დღეს ბოლომდე ვიბრძოლეთ და ურთულეს მომენტში ის გავაკეთეთ, რაც საჭირო იყო“, - განაცხადა მატჩის შემდეგ ქართველმა კალათბურთელმა.
შეგახსენებთ, რომ შენგელიას „ვირტუს ბოლონიას“ 6 მოგება და 8 წაგება აქვს. ქართველი კალათბურთელის გუნდი ევროლიგის ეგიდით მორიგ შეხვედრას 22 დეკემბერს გამართავს და „ბასკონიას“ სტუმრად დაუპირისპირდება.
