„ასეთ სიახლეებზე მეცინება“ - იტალიელი ჟურნალისტი ნიუკასლის ინტერესზე ხვიჩას მიმართ
„ნაპოლის“ ოფიციალური რადიოს, Kiss Kiss Napoli-ის კომენტატორი და ჟურნალისტი, კარლო ალვინო ხვიჩა კვარაცხელიას შესახებ გავრცელებულ ინფორმაციას გამოეხმაურა. ბრიტანულ პრესაში დაიწერა, რომ „კვარას“ გადაბირებით „ნიუკასლი“ ინტერესდება, რომელიც ვარაუდობს, რომ ტრანსფერი 50 მილიონი გირვანქა სტერლინგი დაუჯდება. ალვინომ სწორედ ამ თემაზე გააკეთა კომენტარი და განაცხადა, რომ ეს გამორიცხულია.
„ასეთ სიახლეებზე მეცინება. აურელიო დე ლაურენტისს კარგად ვიცნობ და ვფიქრობ, შემიძლია, ვთქვა, რომ ნაპოლის პრეზიდენტი ამ ფეხბურთელს გუნდში რამდენიმე წლით დატოვებს. კვარაცხელიას ახალგაზრდული ასაკი და მისი შესაძლებლობები თანამედროვე სატრანსფერო ბაზარზე განსხვავებას ქმნის. თუ მის შეფასებას გადაწყვეტთ, მინიმუმ 120 მილიონიდან უნდა დაიწყოთ და წინააღმდეგ შემთხვევაში, საუბარიც არაა საჭირო“.
შეგახსენებთ, 2019-22 წლებში ხვიჩა კვარაცხელია ყაზანის „რუბინში“ თამაშობდა, ლეონიდ სლუცკისთან მუშაობისას დიდი პროგრესი აჩვენა, შემდეგ მცირე დრო ბათუმის „დინამოში“ გაატარა და მიმდინარე სეზონში „ნაპოლიში“ ბრწყინვალედ ასპარეზობს. „პარტენოპეიში“ გადასვლისას ხვიჩას სატრანსფერო ღირებულებამ 10 მილიონი ფუნტი სტერლინგი შეადგინა.
ქართველ ფეხბურთელს სერია A-ს მიმდინარე სეზონში 12 მატჩში 6 გოლი შეაგდო და 5 საგოლე პასი შეასრულა. ასევე, ჩემპიონთა ლიგის 5 მატჩში 2 გოლითა და 3 საგოლე პასით გამოიჩინა თავი. „ლივერპულთან“ მიღებული ტრავმის შემდეგ სერია ა-ს ბოლო სამ ტურში არ უთამაშია.
