ჯოკერის საოცარი მატჩი - დენვერმა ვაშინგტონის დაცვა არ შეიმჩნია
„დენვერ ნაგეთსმა“ ზედიზედ მე-3 შეხვედრა მოიგო. კოლორადოელებმა მიმდინარე რეგულარულში მე-17 გამარჯვება „ვაშინგტონ უიზარდსის“ წინააღმდეგ იზეიმეს და საკადრო პრობლემების მქონე მეტოქე 141:128 დაამარცხეს.
„დენვერის“ რიგებში საუკეთესო ნიკოლა იოკიჩი იყო, რომელსაც არანორმალური მატჩი ჰქონდა. „ჯოკერმა“ პარკეტზე 33 წუთი გაატარა და 43 ქულა, 14 მოხსნა, 8 შედეგიანი გადაცემა, 5 ჩაჭრა და 1 დაფარება გაიფორმა. ნიკოლამ 20-დან 17 ბურთი ჩააგდო და 3 გაფუჭებული სროლიდან, 2 სამქულიანი იყო. იოკიჩი პირველი კალათბურთელია, რომელმაც 43 ქულა, 14 მოხსნა, 8 ასისტი და 5 ჩაჭრა ისე დააგროვა, რომ პარკეტიდან მინიმუმ 50 პროცენტით შეუტია. ბოლოს ეს ლარი ბერდმა გააკეთა, „ჯოკერის“ პროცენტი კი 85 გახლდათ, რაც ფენომენალური შედეგია.
43 PTS (season-high)
— NBA (@NBA) December 15, 2022
14 REB
8 AST
5 STL
17/20 FGM
Nikola Jokic did it ALL in the Nuggets W. pic.twitter.com/svywgmbFEt
სერბი ცენტრის გარდა, აარონ გორდონი გამოირჩა, რომელმაც 22 ქულა და 7 მოხსნა მიითვალა. ბოუნს ჰაილენდის ანგარიშზე 23 ქულა და 6 ასისტი იყო, ბრიუს ბრაუნმა კი 13 ქულა გააკეთა. „ვაშინგტონის“ მხრიდან 24 ქულით კაილ კუზმა გამოირჩა. უილ ბარტონს 22 ქულა ჰქონდა, მონტე მორისის ანგარიშზე კი 20 ქულა და 7 ასისტი იყო.
ამრიგად, „დენვერის“ ანგარიშზე 17 მოგება და 10 მარცხია და „ნაგეთსი“ დასავლეთ კონფერენციაში მე-3 ადგილს იკავებს. იოკიჩის გუნდი მომდევნო შეხვედრას 17 დეკემბერს, „ლოს ანჯელეს ლეიკერსის“ წინააღმდეგ გამართავს.
