ფინიქსმა დალასი უშანსოდ დატოვა - ბუკერის 28 ქულა და პოლის ისტორიული შედეგი
„მაიამი ჰიტის“ მსგავსად, საკუთარ კედლებში გამართული მე-5 შეხვედრა დასავლეთ კონფერენციის პირველადგილოსანმა, „ფინიქს სანსმაც“ მოიგო. სტუმრად განცდილი ორი მარცხის შემდეგ, არიზონელებმა „დალას მავერიქსს“ შანსი არ დაუტოვეს და 110:80 იმარჯვეს.
„ფინიქსს“ ზედიზედ 3 შეხვედრა მთელი სეზონის განმავლობაში არ ჰქონდა წაგებული და ტრადიცია არც ამჯერად დაარღვია. „სანსის“ წარმატების მთავარი შემოქმედი დევინ ბუკერი გახლდათ, რომელმაც 28 ქულა და 7 მოხსნა დააგროვა. ბუკერი „ფინიქსის“ ისტორიაში მეორე კალათბურთელია, რომელმაც პლეიოფში გამართულ პირველ 30 შეხვედრაში მინიმუმ 800 ქულა გაიფორმა. დევინმა ჩარლზ ბარკლის მიღწევა გაიმეორა.
The @Suns were led by @DevinBook in their Game 5 W!
— NBA (@NBA) May 11, 2022
???? 28 PTS
???? 7 REB
???? 2 STL
???? The Suns take a 3-2 series lead
Game 6: Thursday, 9:30pm/et on ESPN pic.twitter.com/27Q9rovYzz
ბუკერის გარდა, დეანდრე ეიტონი გამოირჩა, რომელმაც 20 ქულა და 9 მოხსნა მიითვალა, კრის პოლმა კი ისტორიული შედეგი დააფიქსირა. „სიპი3“ სტივ ნეშს გაუთანაბრდა და კარიერაში, პლეიოფის ეგიდით 54-ე 10-ასისტიანი მატჩი ჩაატარა. მასზე უკეთესი შედეგი მხოლოდ ჯონ სტოკტონსა და მეჯიქ ჯონსონს აქვთ.
„დალასის“ რიგებში საუკეთესო ლუკა დონჩიჩი იყო - 28 ქულა, 11 მოხსნა, 2 შედეგიანი გადაცემა. აღსანიშნავია, რომ ლუკასთვის 2 ასისტი პლეიოფის მატჩებში ყველაზე ცუდი შედეგია. ჯეილენ ბრანსონს 21 ქულა ჰქონდა, ხოლო დავის ბერტანსი 10 ქულას დასჯერდა.
ამრიგად, „ფინიქსისა“ და „დალასის“ სერიაში ანგარიში 3:2 გახლავთ. მომდევნო შეხვედრა ტექსასში გაიმართება და მატჩი 13 მაისს, თბილისის დროით, 05:30-ზე გახლავთ ჩანიშნული.
