შერმადინის 3 წუთი და 3 ქულა - ტენერიფემ ტელეკომი დაამარცხა
საკალათბურთო ევრო თასზე ლაგუნა ტენერიფემ თურქ ტელეკომს უმასპინძლა და 82:75 დაამარცხა.
გიორგი შერმადინი სათადარიგოთა სკამზე მოგვევლინა, რომელმაც ტრავმის გამო საკმაოდ დიდი ხანი გამოტოვა.
რა თქმა უნდა, ქართველ კალათბურთელს სათამაშო დრო მიეცა, თუმცა საკმაოდ ცოტა.
შერმადინმა პარკეტზე 3 წუთი და 6 წამი გაატარა. ამ პერიოდის განმავლობაში 37 წლის ცენტრმა 3 ქულას მოუყარა თავი.
ესპანურ კლუბს ამერიკელმა ვინს ჰანთერმა ულიდერა, რომელმაც არასრულ 18 წუთში 14 ქულა და 5 მოხსნა მიითვალა.
ცნობისთვის, ლაგუნა ტენერიფე შემდეგ მატჩს ლიგა ენდესაში, 3 ოქტომბერს სტუმრად უნიკახას წინააღმდეგ გამართავს. აღნიშნული შეხვედრა თბილისის დროით 21:30-დან დაიწყება.
