შენგელიას 16 ქულა - ცსკა-მ პანათინაიკოსი დაამარცხა
ევროლიგის რეგულარული სეზონის მე-18 ტურში მოსკოვის ცსკა პანათინაიკოსს ესტუმრა და ძალიან მარტივად 98:74 დაამარცხა. „არმიელები“ მთელი მატჩის განმავლობაში დომინირებდნენ, რაც საბოლოო შედეგზე ნათლად აისახა.
Есть первая победа в Евролиге в 2022 году! pic.twitter.com/X1evAGpaH4
— CSKA Moscow (@cskabasket) January 12, 2022
სასტარტო ხუთეულში თორნიკე შენგელია მოგვევლინა, რომელმაც პარკეტზე 19 წუთი და 57 წამი დაყო. ამ პერიოდის განმავლობაში ქართველმა კალათბურთელმა 16 ქულას, 4 მოხსნას და 4 შედეგიან გადაცემას მოუყარა თავი. რუსების მხრიდან საუკეთესო გრიგონისი იყო, რომელმაც 19 ქულა, 1 მოხსნა და 3 პასი დააგროვა.
შეგახსენებთ, რომ ამ გამარჯვების შემდეგ, რუსული კლუბი მე-7 ადგილზე იმყოფება. 11 მოგება და 7 წაგება - ასეთია თორნიკე შენგელიას გუნდი შედეგი. ცნობისთვის, მომავალ ტურში ცსკა „ლიონს“ უმასპინძლებს. მატჩი 14 იანვრით თარიღდება და თბილისის დროით 23:00-დან დაიწყება.
ასევე გეტყვით, რომ წინა ტურში „არმიელები“ ევროლიგაზე „ბარსელონას“ უნდა შეხვედროდნენ, თუმცა კატალონიურ კლუბში კორონავირუსმა იფეთქა და მატჩი გაურკვეველი ვადით გადაიდო.
