ლივერპული 2:0 ატლეტიკო - მატჩის შემდეგ

ჩემპიონთა ლიგის მე-4 ტურში ცენტრალური დაპირისპირება გაიმართა. „ლივერპულმა“ „ატლეტიკოს“ უმასპინძლა და 2:0 დაამარცხა. მერსისაიდელები მთელი მატჩის განმავლობაში აქტიურობდნენ და დამსახურებული გამარჯვება მოიპოვეს.

შეიძლება ითქვას, რომ კლოპის გუნდმა „როხიბლანკოს“ არაფრის შანსი არ მისცა. მასპინძლები მალევე დაწინაურდნენ. ანგარიში მე-13 წუთზე ჟოტამ გახსნა. 21-ე წუთზე კი სადიო მანემ სხვაობა ორამდე გაზარდა. პორტუგალიელმა თავდამსხმელმა დუბლიც გაიფორმა, თუმცა ვიდეო რეფერის გადამოწმების შემდეგ გოლი გაუქმდა. ლუის სუარესმა ყოფილ გუნდს გაუტანა, მაგრამ მსგავსად ჟოტას გოლისა, არც ეს ჩაითვალა. ამ გამარჯვების შემდეგ, „ლივერპული“ მერვედფინალში ოფიციალურად გავიდა.

საინტერესო ფაქტები

„ატლეტიკოს“ დამარცხების შემდეგ „ლივერპულს“ ყველა ტურნირზე ერთად 25-მატჩიანი წაუგებელი სერია დაუგროვდა. 1982 წლის შემდეგ მერსისაიდულ გრანდს ასეთი შედეგი არ ჰქონია.

იურგენ კლოპმა „ლივერპულის“ მწვრთნელის რანგში მე-200 მატჩი მოიგო და ამ შედეგით ის მე-5 ადგილზე გადავიდა. მასზე მეტი მატჩი „ლივერპულს“ კენი დალგლიშმა(222), ბობ პაისლიმ(307), ტომ უოთსონმა(329), ბილ შანკლიმ(407) მოაგებინა.

2018/2019 წლების სეზონის შემდეგ, ყველა ტურნირზე ერთად ალექსანდრ-არნოლდზე მეტი საგოლე გადაცემა მხოლოდ კევინ დე ბრუინს აქვს(51). ინგლისელ უკანახაზელს კი 44 შედეგიანი გადაცემა დაუგროვდა.

მადრიდის „ატლეტიკომ“ ჩემპიონთა ლიგაზე ერთ ტაიმში 2 გოლი 105 მატჩის წინ გაუშვა. ასევე „როხიბლანკოს“ ერთი და იგივე გუნდის წინააღმდეგ ზედიზედ ორჯერ ფეხბურთელი პირველად გაუძევეს.

რა თქვა კლოპმა მატჩის შემდეგ?

„გვინდოდა, რომ იდეალური მატჩი ჩაგვეტარებინა და თითქმის იდეალურს მივუახლოვდით. გოლები სწორ მომენტში გავიტანეთ. „ატლეტიკო“ მადრიდში უფრო აქტიური იყო, თუმცა მათ დღეს კარგად დაიწყეს და ჩემმა დაცვამ თავი ყველაფერს კარგად გაართვა. ტრენტმა ორი საოცარი საგოლე გადაცემა შეასრულა. ეს რომ არ აღვნიშნო არ შეიძლება.

ორივე გოლის დროს ფეხბურთელებმა იდეალური დასასრული შემოგვთავაზეს. განსაკუთრებით კი ეს სადიო მანემ გააკეთა. ჟოტას მომენტი უფრო ადვილი იყო, თუმცა მასაც აპლოდისმენტებს ვუძღვნი."

რა თქვა სიმეონემ მატჩის წინ?

„ყველამ ნახეთ, რომ მატჩი კარგად დავიწყეთ. შემდეგ ზედიზედ ორი გოლი მივიღეთ. შემდეგ ფეხბურთელი გაგვიძევეს. ზედიზედ ორჯერ „ლივერპულისნაირ“ გუნდთან 10 კაცით თამაში ადვილი არ არის. აქაურობას თავაწეულები ვტოვებთ, რადგან მაქსიმუმი გავაკეთეთ. წინ ორი მნიშვნელოვანი შეხვედრა გველოდება.

ვფიქრობ ახლა მსაჯებზე კი არა, გუნდის განვითარებაზე უნდა ვფიქრობდეთ. ერთად მუშაობა უნდა გავაგრძელოთ. რთულ ჯგუფში ვართ, მაგრამ ეს ჩვენთვის ახალი არ არის. კოლოსალური გამოცდილება გვაქვს და ყველაფერს გავუმკლავდებით. „მილანთან“ ადვილი მატჩი არ გველოდება. ვიმეორებ, მსაჯებზე საუბარი არ მინდა.“

სატურნირო ცხრილი

როგორც უკვე მოგახსენეთ, „ლივერპული“ ოფიციალურად მერვედფინალში გავიდა. იურგენ კლოპის გუნდს 100%-იანი შედეგი აქვს. 4-დან 4 გამარჯვება და 9 ქულა. მეორე პოზიციაზე „პორტუა“ 5 ქულით. მესამე ადგილს „ატლეტიკო“ იკავებს 4 ქულით, ხოლო უკანასკნელ პოზიციაზე „მილანია“ 1 ქულით.

გამოიწერეთ ჩვენი Youtube არხი