ჯერ ქვა ესროლეს, შემდეგ მძევლებად აიყვანეს - განაში ქომაგებმა მსაჯების ცემა სცადეს
განის რანგით მეორე დივიზიონში გამართულ შეხვედრას, რომელშიც ერთმანეთს „ნკორანზა უორიორსი“ და „რეალ ტამალე იუნაიტედი“ დაუპირისპირდნენ, თან რამდენიმე ინციდენტი ახლდა.
მატჩი ფრედ, 0-0 დასრულდა და მსაჯების მიერ მიღებულმა გადაწყვეტილებებმა ადგილობრივი ქომაგი გააღიზიანა. „ნკორანზა უორიორსის“ გულშემატკივრები თვლიდნენ, რომ არბიტრები სტუმრებს ეხმარებოდნენ და პირველ ტაიმში ლაინსმენს ქვები დაუშინეს. გვერდითა მსაჯს ერთი ქვა მოხვდა და მთავარი არბიტრი იძულებული გახდა, მატჩი 15 წუთით შეეჩერებინა.
შეხვედრის განახლება მოხერხდა და გუნდები ნულოვან ფრეს დასჯერდნენ. საფინალო სასტვენის შემდეგ, ქომაგები სტადიონის შიდა პერიმეტრზე შეიჭრნენ და სურდათ, მსაჯებს ფიზიკურად გასწორებოდნენ. გავრცელებული ინფორმაციით, გულშემატკივრებმა არბიტრები და მეტოქე გუნდის ფეხბურთელები მძევლებად აიყვანეს და რამდენიმე მათგანმა მცირე დაზიანებებიც მიიღო.
Terrible incidents were recorded in Nkoranza today when Nkoranza Warriors drew 0-0 with RTU in Division One League.
— Evans Gyamera-Antwi(Ashes) (@ashesgyamera) April 28, 2021
The assistant referee 1 was allegedly hit with stones in the first half & the referee had to halt the game
Referees & RTU players now held hostage after full time pic.twitter.com/5y2HSSOv6B
ვითარების განმუხტვა პოლიციის ჩარევის შედეგად მოხერხდა და მსაჯებმა სტადიონი სამართალდამცველების დახმარებით დატოვეს. მოგვიანებით, „ნკორანზა უორიორსის“ ქომაგებმა განცხადება გაავრცელეს და აღნიშნეს, რომ მათი გუნდის საწინააღმდეგო მსაჯობა სისტემატურ მოვლენას წარმოადგენს.
„საკმარისია ეს სისულელე! მსაჯები აქ იმ განზრახვით ჩამოდიან, რომ სტუმარ გუნდს დაეხმარონ და ნკორანზა უორიორსი ყოველთვის არახელსაყრელ მდგომარეობაშია. არბიტრების მხრიდან ეს უნდა შეწყდეს და განელმა მსაჯებმა გუნდების მხარდაჭერა უნდა შეწყვიტონ. ისინი ქურდები და მატყუარები არიან“.
