"ჩელსი" 1:2 "ლივერპული" - "მერსისაიდელთა" 6-დან ექვსი!

პრემიერლიგის მე-6 ტურის ცენტრალური ჯახი „სტემფორდ ბრიჯზე“ შედგა - „ჩელსიმ“ „ლივერპულს“ უმასპინძლა.

იურგენ კლოპის გუნდმა თავისი საოცარი მსვლელობა განაგრძო და ლონდონში ზედიზედ მე-6 გამარჯვება მოიპოვა!

შეხვედრაში ანგარიში მე-14 წუთზე ალექსანდრ-არნოლდის შესანიშნავი ჯარიმით გაიხსნა.

რობერტო ფირმინომ „მერსისაიდელებს“ 30-ე წუთზე კომფორტული უპირატესობა შეუქმნა - 0:2.

მეორე ტაიმში „ჩელსი“ გააქტიურდა და ამას შედეგიც მოჰყვა. 71-ე წუთზე ნგოლო კანტემ საოცარი დრიბლინგის შედეგად ულამაზესი დარტყმით ანგარიში შეამცირა.

მიუხედავად ბევრი მცდელობისა „არისტოკრატებმა“ ანგარიშის გათანაბრება ვერ მოახერხეს და მორიგი მატჩი დათმეს.

კლოპის გუნდი პრემიერლიგას უდანაკარგოდ ლიდერობს და „სიტის“ კვლავ 5 ქულით უსწრებს.