The Athletic: არსენალმა ვინისიუსის ტრანსფერზე მუშაობა დაიწყო

ლონდონის „არსენალი“ მადრიდის „რეალის“ ვარსკვლავის, ვინისიუს ჟუნიორის, ტრანსფერით სერიოზულად დაინტერესდა და ბრაზილიელის დამატებას ზაფხულის სატრანსფერო ფანჯრის მთავარ პრიორიტეტად მიიჩნევს.

ინგლისური გამოცემა The Athletic-ის ინფორმაციით, კლუბებს შორის ოფიციალური მოლაპარაკებები ჯერ არ დაწყებულა, თუმცა „არსენალმა“ ტრანსფერისთვის მზადება უკვე დაიწყო. ლონდონელები იმ გარემოებით სარგებლობას ცდილობენ, რომ ვინისიუსს „რეალთან“ კონტრაქტი ჯერ არ გაუხანგრძლივებია.

წყაროს ცნობით, „არსენალში“ ამ ტრანსფერზე მუშაობა მხოლოდ მას შემდეგ დაიწყეს, რაც დარწმუნდნენ, რომ როგორც სპორტული, ისე ფინანსური თვალსაზრისით ასეთი გარიგების განხორციელება რეალური იქნებოდა.

გავრცელებული ინფორმაციით, კლუბის ხელმძღვანელობაც და მთავარი მწვრთნელი მიკელ არტეტაც ერთ აზრზე არიან — ვინისიუსი სწორედ ის ფეხბურთელია, რომელიც გუნდს ჩემპიონთა ლიგის მოგებაში დაეხმარება.

აღსანიშნავია, რომ ეს საკითხი იან დიომანდეს ტრანსფერს პირდაპირ არ უკავშირდება, თუმცა გარკვეული კავშირი მაინც არსებობს. ორივე ფეხბურთელი ძირითადად მარცხენა ფლანგზე თამაშობს და ერთი და იგივე სააგენტოც წარმოადგენს.

ვინისიუსის მომავალი ამ ეტაპზე მის ახალ კონტრაქტზეა დამოკიდებული. ბრაზილიელსა და „რეალს“ შორის მოლაპარაკებები უკვე რამდენიმე თვეა მიმდინარეობს, თუმცა შეთანხმება ჯერ ვერ შედგა.

როგორც AS-ი წერს, ვინისიუსი ორშაბათს შვებულებიდან დაბრუნდება და კლუბის ხელმძღვანელობასთან კონტრაქტის გახანგრძლივების საკითხზე მოლაპარაკებებს გამართავს.

„არსენალში“ იმედოვნებენ, რომ „რეალს“ არ მოუნდება ისეთი ფეხბურთელის უფასოდ დაკარგვა, როგორიც ვინისიუსია, რომლის მოქმედი კონტრაქტიც 2027 წელს იწურება.

სწორედ ეს გაურკვეველი ვითარება აძლევს ლონდონურ კლუბს ოპტიმიზმის საფუძველს. მიუხედავად იმისა, რომ „არსენალს“ უკვე ძალიან ძლიერი შემადგენლობა ჰყავს, კლუბში მიაჩნიათ, რომ გუნდს ჯერ კიდევ აკლია ფეხბურთელი, რომელსაც მატჩის ბედის მარტო გადაწყვეტა შეუძლია.

თუმცა, წყაროს ცნობით, ვინისიუსი ერთადერთი კანდიდატი არ არის. „არსენალი“ პარალელურად იმავე პოზიციის კიდევ რამდენიმე მსოფლიო დონის ფეხბურთელის დამატების შესაძლებლობასაც განიხილავს.