10-კაციანი დილას მარცხი | გორში აპოლონთან 0:4 წააგეს

უეფას კონფერენს ლიგის მეორე საკვალიფიკაციო ეტაპზე გორის „დილას“ მეტოქე „აპოლონი“ გახლავთ. პირველი შეხვედრა გორში, თენგიზ ბურჯანაძის სახელობის სტადიონზე გაიმართა და კვიპროსელებმა მომდევნო ეტაპის საგზური პრაქტიკულად გაინაღდეს — 0:4.

მატჩში ანგარიში მე-14 წუთზე გაიხსნა. მცველებისა და მეკარის შეუთანხმებელი მოქმედებით ბრენდონ ტომასმა ისარგებლა და „აპოლონი“ დააწინაურა. 28-ე წუთზე ტომასმა ბრწყინვალედ იმოქმედა და გატენ ვაისბეკს გაატანინა — 0:2.

მე-40 წუთზე „დილას“ მდგომარეობა დამძიმდა. შეხვედრის მთავარმა არბიტრმა, დანიელ ჰიგრაფმა ნანა კოფი დონკორს წითელი ბარათი უჩვენა და მოედნიდან გააძევა. 51-ე წუთზე თედო კიკაბიძემ ბურთი საკუთარ კარში ჩაჭრა, ხოლო 88-ე წუთზე თავი ალენ ოზბოლტმა გამოიჩინა და „აპოლონმა“ 4:0 მოიგო.

ცნობისთვის, ამ გუნდების განმეორებითი შეხვედრა ერთ კვირაში გაიმართება. „აპოლონი“ მასპინძლის რანგში იქნება და მომდევნო ეტაპზე გასვლის შემთხვევაში „ბრანს“ ან „უნ. კლუჟს“ დაუპირისპირდება.