მძიმე ბრალდება | თარჯიმანი კაბო-ვერდეს კაპიტანს გაუპატიურებაში ადანაშაულებს

კაბო-ვერდეს ნაკრების კაპიტანი რაიან მენდესი გაუპატიურებაშია ეჭვმიტანილი. 36 წლის ნახევარმცველის, რომელიც თურქულ „იგდირში“ თამაშობს, წინააღმდეგ ბრალდება ბრაზილიელმა ქალმა წამოაყენა. მისი განცხადების თანახმად, ინციდენტი მიმდინარე წლის 27 მარტს ახალ ზელანდიაში, იმ სასტუმროში მოხდა, სადაც კაბო-ვერდეს ნაკრები ჩილესა და ფინეთთან ამხანაგური მატჩების წინ გაჩერდა. ახალი ზელანდიის პოლიცია გამოძიებას 10 აპრილიდან აწარმოებს.

ბრაზილიელი ქალი ამ სასტუმროში ახალი ზელანდიის ფეხბურთის ფედერაციის მოწვევით იმყოფებოდა, როგორც კაბო-ვერდეს დელეგაციის (რომლის ოფიციალური ენა პორტუგალიურია) თარჯიმანი, ასევე FIFA Series-ის ამხანაგური ტურნირის დროს ნაკრებისთვის ოპერატიული მხარდაჭერის აღმოსაჩენად. დაზარალებული ახალ ზელანდიაში ცხოვრობს და მუშაობს.

ბრაზილიურმა გამოცემა Globo-მ მოიპოვა პოლიციისთვის გადაცემული ჩაქცევების ფოტოები, პოლიციის ოქმი და იმ კლინიკის სამედიცინო დასკვნა, სადაც ბრაზილიელ ქალს დახმარება გაუწიეს, მათ შორის გამოკვლევების შედეგები და სავარაუდო ინციდენტის შემდეგ გაწეული ფსიქოლოგიური დახმარების მონაცემები.

განმცხადებლის თქმით, ჩილეს ნაკრებთან მატჩის შემდეგ იგი კაბო-ვერდეს გუნდისთვის დაჯავშნილ ერთ-ერთ ნომერში მიიწვიეს და ისიც მივიდა, რადგან ეგონა, რომ თარჯიმნის როლის შესრულება მოუწევდა. თუმცა, მიხვდა, რომ იქ არაფორმალური შეხვედრა მიმდინარეობდა, და როცა თავი შეუძლოდ იგრძნო, საკუთარ ოთახში დაბრუნდა. მალევე მან კარზე კაკუნი გაიგო და გააღო, რადგან ეგონა, რომ სამუშაოს გამო ეძახდნენ.

საჩივრის თანახმად, სწორედ ამ მომენტში ოთახში შევიდა რაიან მენდესი, რომელიც თავს დაესხა მას, ახრჩობდა, სცემდა და კბენდა, სანამ ის თავდაცვას ცდილობდა, შემდეგ კი გააუპატიურა. ამის შემდეგ დაზარალებულმა ხილული დაზიანებები გადაიღო, როგორიცაა ჭრილობები ტუჩებზე, ჩაქცევები კისერზე, ფეხსა და გვერდზე.

პოლიციამ ამოიღო სასტუმროს სათვალთვალო კამერების ჩანაწერები და ელოდება სასამართლო-სამედიცინო ექსპერტიზის დასკვნას, რის შემდეგაც მიიღებს გადაწყვეტილებას, გადასცეს თუ არა საქმე სასამართლოს.

10 მაისს ბრაზილიელმა ქალმა და მისმა ქმარმა კაბო-ვერდეს ფეხბურთის ფედერაციასა და ფიფას გაუგზავნეს წინასასამართლო შეტყობინებები ანგარიშით, მტკიცებულებებით და მოთხოვნით, დაესაჯათ ფეხბურთელი და ჩამოეშორებინათ იგი მსოფლიო ჩემპიონატში მონაწილეობისგან. 20 მაისს მათ შეავსეს ფიფას საჩივრების ფორმა, თუმცა მათი თქმით, პასუხი მაინც არ მიუღიათ.