მარკოიშვილმა მონაკო ფინალში გაიყვანა - ერთი ნაბიჯი ჩემპიონობამდე

„მონაკო“ საფრანგეთის საკალათბურთო ჩემპიონატის ფინალში გავიდა. ნახევარფინალის მეოთხე შეხვედრაში მანუჩარ მარკოიშვილის მომზადებულმა „თავადებმა“ სტუმრად „ნანტერი“ 11-ქულიანი სხვაობით, 89:78 დაამარცხეს, სერიაში 3:1 გაიმარჯვეს და გადამწყვეტ მატჩში ასპარეზობის უფლება მოიპოვეს, სადაც მათი მეტოქე „პარიზი“ - შოლეს“ წყვილის გამარჯვებული იქნება.

მარკოიშვილის მომზადებულ კალათბურთელებს შორის ყველაზე შედეგიანი ელი ოკობო იყო, რომელმაც 30 წუთში 24 ქულა, 4 მოხსნა და 4 შედეგიანი გადაცემა დააგროვა. მან სამიდან ერთი სამქულიანი, ცხრიდან ხუთი ორქულიანი და ცამეტიდან თერთმეტი საჯარიმო ჩააგდო. რაც შეეხება „ნანტერს“, ამ გუნდში დონტა სკოტმა 27 წუთში დაგროვებული 22 ქულით, 3 მოხსნითა და 1 გადაცემით გამოიჩინა თავი.

აღსანიშნავია, რომ უკანასკნელი სამი სეზონია „მონაკო“ საფრანგეთის ჩემპიონატის ფინალში გადის და თუ 2023-2024 წლებში ოქროს მედლები დაისაკუთრა, შარშან გადამწყვეტი შეხვედრა წააგო და ქართველი მწვრთნელის ხელმძღვანელობით წელს ჩემპიონის ტიტულის დაბრუნებას შეეცდება.