შენგელიას 15 ქულა | ბარსელონამ ოვერტაიმში მოიგო

ესპანეთის საკალათბურთო ჩემპიონატის, Liga ACB-ის ბოლო ტურში თორნიკე შენგელიას „ბარსელონა“ სტუმრად „მორაბანკ ანდორას“ დაუპირისპირდა. კატალონიელებმა რთული შეხვედრა მოიგეს და ოვერტაიმში, 100:95 იმარჯვეს.

„მორაბანკ ანდორა“ სასურველ შედეგთან ახლოს იყო და საფინალო სირენამდე 17 წამით ადრე, 3 ქულით იგებდა, თუმცა კევინ პანტერმა წონასწორობა აღადგინა ­­- 86:86. ოვერტაიმში გადამწყვეტი ქულები სწორედ პანტერმა აიღო და მნიშვნელოვანი ორიანი და სამიანი გაიფორმა.

შენგელიამ პარკეტზე 33 წუთი და 10 წამი გაატარა. ამ დროის განმავლობაში მის ანგარიშზე 15 ქულა, 7 მოხსნა და 1 შედეგიანი გადაცემა იყო. თორნიკემ 7-დან 5 ორქულიანი ჩააგდო და 6-დან 5 საჯარიმო სროლა გამოიყენა. მასზე მეტი ქულა „ბარსელონას“ რიგებში მხოლოდ პანტერს ჰქონდა - 26.

ცნობისთვის, „ბარსელონას“ 24 მოგება და 9 წაგება აქვს და სატურნირო ცხრილის მეხუთე პოზიციას იკავებს. „ბლაუგრანას“ ერთი გადადებული მატჩი აქვს ჩასატარებელი და 31 მაისს, „ვალენსიას“ დაუპირისპირდება. სწორედ ეს შეხვედრა გაარკვევს, რომელ ადგილს დაიკავებს კატალონიური გრანდი.