ყველაფერი გააკონტროლა - არბელოას ლა ლიგის წესები არ დაურღვევია
ალვარო არბელოამ „ელჩესთან“ მატჩში მოედანზე არაპირველი გუნდის ფეხბურთელებთან დაკავშირებული ახალი რეგულაცია მაქსიმალურად გამოიყენა — თანაც სრულად გააზრებულად და ზუსტად.
საქმე ისაა, რომ მიმდინარე სეზონიდან წესები შეიცვალა: ადრე აუცილებელი იყო, რომ მოედანზე მინიმუმ შვიდი პირველი გუნდის ფეხბურთელი ყოფილიყო, ახლა კი რეგლამენტი მხოლოდ იმას განსაზღვრავს, რომ ერთდროულად მაქსიმუმ ოთხი აკადემიის მოთამაშე შეიძლება იყოს მოედანზე.
სხვა სიტყვებით რომ ვთქვათ, თუ მოედანზე 7 პირველი გუნდის და 4 აკადემიის ფეხბურთელია და ამ დროს „რეალის“ რომელიმე მოთამაშე წითელ ბარათს მიიღებს, ეს აღარ ჩაითვლება წესების დარღვევად — რაც ადრე შეიძლებოდა პრობლემად ქცეულიყო.
წესის ცვლილების შესახებ არასაკმარისმა ინფორმირებულობამ გარკვეული ეჭვები გააჩინა და გაჩნდა კითხვაც, ხომ არ არსებობდა „რეალ მადრიდის“ მხრიდან დაუშვებელი მოთამაშის გამოყენების რისკი. თუმცა რეალურად ყველაფერი სრულ კონტროლში იყო, რადგან მოედანზე ოთხი „კასტილიაში“ დარეგისტრირებული ფეხბურთელის ყოფნა რეგლამენტით დაშვებულია.
ეს სიტუაცია მატჩის მეორე ტაიმის ბოლო მონაკვეთში შეიქმნა. „რეალმა“ შეხვედრა მხოლოდ ერთი „კასტილიას“ მოთამაშით — ტიაგო პიტარჩით — დაიწყო.
მეორე ტაიმში, არბელოას პირველ ცვლილებებზე, იანესი, არდა გიულერი და გონსალო შევიდნენ მოედანზე, რომლებმაც ჩუამენი, ვალვერდე და ვინისიუსი შეცვალეს. ამ ეტაპზე მოედანზე უკვე ორი „კასტილიას“ ფეხბურთელი იყო.
შემდეგ დიეგო აგუადომ რუდიგერი შეცვალა და მათი რაოდენობა სამამდე გაიზარდა.
ბოლო ცვლილებაზე მოედანზე კიდევ ორი აკადემიის ფეხბურთელი — მანუელ ანხელი და პალასიოსი — შევიდნენ. თუმცა ამ ცვლილებიდან ერთ-ერთი სწორედ ტიაგო პიტარჩის გასვლა იყო, რის შედეგადაც არბელოამ წესები სრულად დაიცვა.
შედეგად, მატჩის ბოლოს მოედანზე ერთდროულად იყო შვიდი პირველი გუნდის და ოთხი „კასტილიას“ ფეხბურთელი — ზუსტად იმ ლიმიტის ფარგლებში, რასაც ახალი რეგულაცია ითვალისწინებს.
