„იმედია, ჩვეულ ფორმას მალე დაიბრუნებენ. მათი როლი გადამწყვეტია“

„ბორდოს“, „ვილიარეალის“, „ლილისა“ და საფრანგეთის ნაკრების ყოფილმა ფეხბურთელმა, რიო მავუბამ, „პარი სენ-ჟერმენის“ სეზონზე ისაუბრა და იმედი გამოთქვა, რომ გუნდის ლიდერები — ხვიჩა კვარაცხელია, უსმან დემბელე და დეზირე დუე — ჩვეულ ფორმას მალე დაუბრუნდებიან.

რას ამბობს მავუბა:

„არ ვიტყოდი, რომ სიტუაცია საგანგაშოა, რადგან მათ სატურნირო ცხრილში პირველი ადგილი დაიბრუნეს. თუმცა, ფაქტია — როდესაც ხედავ, რომ ბარკოლა ლიგა 1-ის ბომბარდირია, ხვდები, რომ ყველაფერი ისე არ მიდის, როგორც გვსურს. იმას არ ვამბობ, რომ ბარკოლას ეს არ შეუძლია, მან გოლები უნდა გაიტანოს, მაგრამ თუ გავიხსენებთ გასულ წელს ნანახს, განსაკუთრებით პსჟ-ს მნიშვნელოვან მატჩებში, კვლავ იმედი გვაქვს, რომ კვარა, დუე და დემბელე ძველ ფორმას დაუბრუნდებიან. მათ მართებთ, რომ გადამწყვეტი როლი ითამაშონ და გოლები გაიტანონ“.

„პარი სენ-ჟერმენი“ 19 ტურის შემდეგ ლიგა 1-ის სატურნირო ცხრილში 45 ქულით პირველ ადგილზეა და მეორე პოზიციაზე მყოფ „ლანსს“ 2 ქულით უსწრებს. ჩემპიონთა ლიგის ჯგუფურ ფაზაში კი პარიზელები 13 ქულით მე-6 საფეხურზე იმყოფებიან. ლუის ენრიკეს გუნდი მომდევნო შეხვედრას სწორედ ჩემპიონთა ლიგაზე, 28 იანვარს, სტუმრად „ნიუკასლის“ წინააღმდეგ გამართავს.