„ვიღაც ცდილობს, რომ სიტუაცია განგებ არიოს“ - ლუის ენრიკე ჭორებმა გააბრაზა

ხვალ, საფრანგეთის თასის 1/16 ფინალში ხვიჩა კვარაცხელიას „პარი სენ-ჟერმენი“ საკუთარ მოედანზე საფეხბურთო კლუბ „პარიზს“ დაუპირისპირდება.

შეხვედრამდე ერთი დღით ადრე პსჟ-ს მთავარმა მწვრთნელმა, ლუის ენრიკემ პრესკონფერენცია გამართა და ჟურნალისტების კითხვებს უპასუხა.

რა თქვა ენრიკემ:

გონსალუ რამუშის შესახებ: „როდესაც ისეთ დიდ კლუბში აწერ კონტრაქტს ხელს, როგორიც პსჟ-ია, არ იცი, რამდენი წუთი მოგიწევს თამაში. ხელმოწერისას შენი პასუხისმგებლობაა, მზად იყო გუნდის დასახმარებლად და რამუშიც, სხვა ბევრი მოთამაშის მსგავსად, სწორედ ამას აკეთებს. ის პროფესიონალიზმის ნამდვილი მაგალითია, სულ მზადაა. დარწმუნებული ვარ, მას გაცილებით მეტი წუთის თამაში სურს, მაგრამ ის ნათლად აჩვენებს, თუ როგორ უნდა იქცეოდეს პსჟ-ს ფეხბურთელი. ვიცი, რომ ის მეტ სათამაშო დროს იმსახურებს, თუმცა უნდა ვთქვა, რომ ძალიან ბედნიერი ვარ რამუშისნაირი მოთამაშის ყოლით. ის ჩვენი საუკეთესო ბომბარდირია და მისი გატანილი გოლების რაოდენობა წარმოუდგენელია.“

ჭორები კლუბის დატოვების შესახებ: „პსჟ-ს გარშემო სულ არის ჭორები. ამას მიჩვეულები ვართ. ეს პირადი საკითხია და ასეთად დარჩება. პსჟ-ს შესახებ ბევრი „ფეიკ ნიუსი“ ვრცელდება. შეიძლება ჩავთვალოთ, რომ კლუბის დესტაბილიზაცია ვიღაცისთვის მნიშვნელოვანია და ცდილობს, რომ სიტუაცია არიოს. მოლაპარაკებების არსებობა ნორმალურია. ჩვენ ვიცით, რა გვინდა და ამ მხრივ მშვიდად, აუღელვებლად ვართ. ეს პირადი საქმეა და ასეთადვე დარჩება.“

დატვირთული კალენდარი: „ყოველ ოთხ დღეში თამაში უფრო პოზიტიურია, ვიდრე ყოველ ათ დღეში. ჩვენ უპირატესობა გვაქვს. პრობლემა მგზავრობებია, რაც დამღლელია, თუმცა ეს არ არის გამართლება — ამას მიჩვეულები ვართ. კონცენტრირებულები ვართ. გვიყვარს საფრანგეთის თასი. ეს განსხვავებული შეჯიბრია. ეს არის განსხვავებული, განსაკუთრებული მატჩი, ფინალის მსგავსი, რადგან შეიძლება გამოვვარდეთ. რა თქმა უნდა, გვსურს ასპარეზობა გავაგრძელოთ.“

დემბელეს შენარჩუნებაზე: „ეს კითხვა ხელმძღვანელობისთვისაა. როდესაც ლუის კამპუშს ნახავთ, შეგიძლიათ ეს კითხვა მას დაუსვათ.“

სამუდამო კონტრაქტი? „მუშაობას ვაგრძელებთ. თუ ჩემს ძველ განცხადებებს გადახედავთ, ყველაფერი ძალიან ნათელია, არაფერი შეცვლილა.“

იქნება პარიზთან შევალიე სასტარტოში? „ხვალ ვნახავთ, როგორი იქნება ჩვენი არჩევანი. თუმცა, სამი მატჩის შემდეგ ჩემი შეხედულება თითოეულ მოთამაშეზე არ შეცვლილა. როგორც წესი, ხდება იმის ძალიან ფართო და ინტენსიური გაუმჯობესება, რასაც ფეხბურთელი აკეთებს კარგად ან ცუდად. ერთი მატჩი ჩვენს აზროვნებასა და მიდგომას ვერ შეცვლის.“

იდეალური პერიოდი ფორმის პიკში შესასვლელად? „მნიშვნელოვანია, მუდმივად ვეძებოთ გზები გაუმჯობესებისთვის. ახლა ისეთი მომენტია, როდესაც თამაშები უნდა მოიგო, რათა ტურნირებზე ასპარეზობა გააგრძელო. წინ კიდევ ბევრი თვეა, თუმცა ჩვენი დონე ახლავე უნდა ვაჩვენოთ, რათა მზად შევხვდეთ მნიშვნელოვან მატჩებს ჩემპიონთა ლიგასა და ლიგა 1-ში. ლიგა 1-ში ბევრი მეტოქეა, რომელიც ძალიან კარგ სეზონს ატარებს, ამიტომ ჩვენი ხარისხი ყოველ მატჩში უნდა დავამტკიცოთ.“

გუნდი მენტალურად მტკიცეა? „გასულ სეზონში მატჩის მიწურულს ბევრი შეხვედრა მოვიგეთ. ასეა ამ სეზონშიც. იღბალიც საჭიროა, მაგრამ ჩვენი მენტალიტეტი განსხვავებულია. ეს ძალიან პოზიტიურია, თუმცა გარკვეული რაღაცები უნდა გავაუმჯობესოთ, რათა ასეთ დაძაბულ სიტუაციაში ნაკლებად ხშირად აღმოვჩნდეთ.“

როგორ ინარჩუნებს გუნდი ტიტულების მოგების მოტივაციას? „ჩვენი შედეგების გაუმჯობესება შეუძლებელია, რადგან ამ სეზონში მსოფლიო საკლუბო ჩემპიონატი არ ტარდება. რაც შეეხება მოტივაციას, ვესაუბრეთ ფეხბურთელებსა და გუნდს და ყველაფერი ძალიან ნათელია: შენ არ ფიქრობ ტიტულებზე, რადგან ეს ბოლო ნაბიჯია. მთავარია, ვიყოთ კონცენტრირებულები იმაზე, რასაც კარგად ვაკეთებთ და რა შეგვიძლია გავაუმჯობესოთ — ეს არის გასაღები. ეს განსხვავებული, განსაკუთრებული მოთამაშეების ჯგუფია და მოხარული ვარ, რომ ასეთი ფეხბურთელები მყავს. თუმცა, ჩვენ კონცენტრაციას ვინარჩუნებთ.“

შეგახსენებთ, რომ „პარი სენ-ჟერმენისა“ და „პარიზის“ დაპირისპირება საფრანგეთის დროით 12 იანვარს, 21:10 საათზე, საქართველოს დროით კი 13 იანვარს, 00:10 საათზე დაიწყება.