მიქაუტაძის ეფექტური გოლით - ვილიარეალმა ხეტაფეს მოუგო

ლა ლიგას მე-15 ტურში გიორგი მიქაუტაძის „ვილიარელმა“ „ხეტაფეს“ უმასპინძლა და 2:0 მოიგო. ქართველი ფორვარდი ძირითად შემადგენლობაში მოგვევლინა და უკვე მე-4 წუთზე შეეძლო გოლის გატანა, თუმცა მისი დარტყმა სტუმართა მეკარემ, დავიდ სორიამ მოიგერია. 38-ე წუთზე გიორგი _)) პასის შემდეგ თავით ურტყამდა, თუმცა სორია ამჯერად უშეცდომო იყო.

მასპინძლები პირველ ტაიმში, მსაჯის მიერ კომპენსირებულ დროში დაწინაურდნენ - ლამაზი დარტყმით თავი ტიეჯონ ბიუკენენმა გამოიჩინა. მეორე ტაიმის დასაწყისში „ხეტაფე“ 10 ფეხბურთელით დარჩა - უხეშობისთვის მოედნიდან ლუის მილია გააძევეს. 64-ე წუთზე მიქაუტაძემ ულამაზესი გოლი გაიტანა და „ვილიარეალის“ უპირატესობა გაზარდა. მარსელინომ ქართველი ფორვარდი მე-80 წუთზე შეცვალა.

მიქაუტაძის გოლი და გამორჩეული მომენტები

მიქაუტაძემ Sofascore-ისგან 7.5-იანი შეფასება დაიმსახურა, მისი სტატისტიკა კი ასეთი იყო: 1 გოლი, 3 დარტყმა, 2 დარტყმა კარში, 1 დაბლოკილი დარტყმა, 27 შეხება ბურთთან, 2-დან 1 წარმატებული დრიბლინგი, 1 არაზუსტი ჩაწოდება, 14-დან 8 ზუსტი პასი (57%), 2-დან 1 ზუსტი გრძელი პასი, 3-დან 2 მოგებული ორთაბრძოლა, 5-დან 2 მოგებული საჰაერო ორთაბრძოლა. გიორგიმ 12-ჯერ დაკარგა ბურთი და მეტოქეს ერთხელ დაარღვევინა წესები.

15 ტურის შემდეგ „ვილიარეალი“ 35 ქულით სატურნირო ცხრილის მე-3 ადგილზეა. 10 დეკემბერს მიქაუტაძის გუნდი ჩემპიონთა ლიგაზე „კოპენჰაგენს“ უმასპინძლებს, ლა ლიგის მომდევნო ტურში კი 14 დეკემბერს „ლევანტეს“ ესტუმრება.