„მადლობა ყველას, ნაკრებს კი წარმატებებს ვუსურვებ“ - შერმადინის გამოსამშვიდობებელი კომენტარი

2027 წლის საკვალიფიკაციო ეტაპის მეორე ტურში, საქართველოს ნაკრები სტუმრად ესპანეთს დაუპირისპირდა და 29 ქულის სხვაობით, 90:61 დამარცხდა.

შეხვედრის დასრულების შემდეგ, ჩვენი გუნდის კალათბურთელმა, გიორგი შერმადინმა განვლილი მატჩი შეაფასა. შეგახსენებთ, რომ შერმადინმა საქართველოს ნაკრების შემადგენლობაში ბოლო შეხვედრა ჩაატარა.

რა თქვა შერმადინმა:

„რთულია, ამ მარცხზე რამის თქმა, მაგრამ მაინც მომიწევს. პირველ რიგში ესპანეთის ნაკრებს მივულოცავ გამარჯვებას, მათ საოცარი თამაში ჩაატარეს. ვფიქრობ, დაცვაში გარკვეული პრობლემები გვქონდა, შეტევაში კი მარტივი ქულები ვერ ავიღეთ. სწორედ ამის გამო იყო ასეთი სხვაობა. ვეცადეთ, ის გაგვეკეთებინა, რაც მწვრთნელმა დაგვავალა, მაგრამ ამ ყველაფრისთვის მზად არ აღმოვჩნდით. რა თქმა უნდა, რთულია ეს მდგომარეობა.“

„ჩემთვის, ეროვნულ ნაკრებში ბოლო თამაში იყო და 20-წლიანი კარიერა დავასრულე... ყველაფერი დასრულდა. პირველ რიგში, მადლობა ჩემს ყველა მწვრთნელს, თანაგუნდელს, სრაფის წევრებს, ექიმებს და რა თქმა უნდა გულშემატკივრებს, რომლებიც ყველგან ჩვენთან ერთად არიან. დღეს ამ არენაზეც იყვნენ და საქართველოშიც ყველა ამ თამაშს უყურებდა. ეროვნულ გუნდს კი მომავალში ბევრ წარმატებას და რაც შეიძლება მეტი თამაშის მოგებას ვუსურვებ. წინ მსოფლიო ჩემპიონატია და ვუსურვებ, რომ ამ მნიშვნელოვან თამაშებში წარმატებას მიაღწიონ. კიდევ ერთხელ, დიდი მადლობა გულშემატკივრებს ასეთი საოცარი მხარდაჭერისთვის.“

„რას ნიშნავს კარიერის ამ არენაზე დასრსულება? ამ გუნდში მეშვიდე სეზონია ვთამაშობ და ყველას ვიცნობ, საოცარი ადამიანები არიან. სასიამოვნო შეგრძნებაა კარიერის აქ დასრულება.“

ესპანეთთან მატჩი გიორგი შერმადინისთვის ეროვნული გუნდის მაისურით 202-ე იყო. ვეტერანი კალათბურთელი ქვეყნის მთავარი გუნდის ღირსებას 20 წლის განმავლობაში იცავდა.

საქართველოს ნაკრები საკვალიფიკაციო ეტაპის მომდევნო ორ მატჩს 2026 წლის თებერვალსა და მარტში ჩაატარებს, ორივე შეხვედრას დანიის ნაკრებთან. 27 თებერვალს სტუმრად და 2 მარტს საკუთარ კედლებში. ამ დროისთვის, ალეკსანდარ ჯიკიჩის გუნდს ორიდან ორი მარცხი აქვს და სატურნირო ცხრილში ბოლო ადგილზე იმყოფება.