„ჩემმა რამდენიმე მოთამაშემ ესპანეთს დაბრუნების შესაძლებლობა მისცა“ - ჯიკიჩი მატჩის შემდეგ

2027 წლის საკვალიფიკაციო ეტაპის მეორე ტურში, საქართველოს ნაკრები სტუმრად ესპანეთს დაუპირისპირდა და 29 ქულის სხვაობით, 90:61 დამარცხდა.

შეხვედრის დასრულების შემდეგ, ჩვენი გუნდის მთავარმა მწვრთნელმა, ალეკსანდარ ჯიკიჩმა განვლილი მატჩი შეაფასა და უკმაყოფილება ვერ დამალა.

რა თქვა ჯიკიჩმა:

„ვულოცავ ესპანეთს გამარჯვებას, ამ საკვალიფიკაციო ეტაპზე ისინი სწორი გზით მიდიან, ჩვენ კი არა. ვფიქრობ, თამაშის ერთ ნაწილში სწორად ვითამაშეთ, შემდეგ კი ჩემმა ზოგიერთმა კალათბურთელმა განსხვავებული ხასიათი გამოავლინა და ეს ესპანეთის ნაკრებს დაბრუნებაში დაეხმარა, ამით დამატებითი თავდაჯერებაც მოიპოვეს, რითმი იპოვეს და შედეგიც ნახეთ. ასე რომ, არის რამდენიმე საკითხი, რომელსაც მომავლისთვის აუცილებლად გავარკვევთ. სანამ საქართველოს ნაკრების მწვრთნელი ვარ, ასეთ რაღაცებს არ დავუშვებ!“

საქართველოს ნაკრები საკვალიფიკაციო ეტაპის მომდევნო ორ მატჩს 2026 წლის თებერვალსა და მარტში ჩაატარებს, ორივე შეხვედრას დანიის ნაკრებთან. 27 თებერვალს სტუმრად და 2 მარტს საკუთარ კედლებში. ამ დროისთვის, ალეკსანდარ ჯიკიჩის გუნდს ორიდან ორი მარცხი აქვს და სატურნირო ცხრილში ბოლო ადგილზე იმყოფება.