მძიმე მარცხი ესპანეთში - შერმადინი ნაკრებს 202 მატჩით დაემშვიდობა

2027 წლის მსოფლიო ჩემპიონატის საკვალიფიკაციო ეტაპის მეორე ტურში, საქართველოს ნაკრები სტუმრად ესპანეთს დაუპირისპირდა და სამწუხაროდ 29 ქულის სხვაობით, 90:61 დამარცხდა.

თუ არ ჩავთვლით პირველ მეოთხედს, საერთო ჯამში საქართველოს ნაკრები საკმაოდ სუსტად გამოიყურებოდა და მეტოქეს პრაქტიკულად ვერაფერი დაუპირისპირა. ალეკსანდარ ჯიკიჩის გუნდმა პირველი მეოთხედი 22:19 მოიგო, თუმცა ეს იყო ერთადერთი პოზიტივი, რაც დღევანდელ მატჩში ვიხილეთ.

მეორე მეოთხედში ჩვენი გუნდი 28:11 დამარცხდა, მესამე მეოთხედი 23:13 დათმო, დასკვნითი მეოთხედი კი 20:15. საგულისხმოა, რომ მეოთხე მეოთხედში ჯიკიჩმა თორნიკე შენგელია, გიორგი შერმადინი და თად მაკფადენი არ ათამაშა. სამწუხაროდ, ტრავმა მიიღო დუდა სანაძემ, რომელიც პარკეტზე მეორე ნახევარში საერთოდ არ გამოჩენილა.

საქართველოს ნაკრებიდან მარგი ქმედების კოეფიციენტით (13) საუკეთესო გიორგი შერმადინი იყო, რომელმაც 24:55 წუთში 8 ქულა, 6 მოხსნა და 2 შედეგიანი გადაცემა დააგროვა. გამორჩეული მატჩი ჰქონდა 17 წლის მათე ხატიაშვილს, რომელმაც 21:07 წუთში 10 ქულა, 1 მოხსნა და 3 შედეგიანი გადაცემა დააგროვა. 10 ქულა ჰქონდა თორნიკე შენგელიასაც, რომელმაც ამას 7 მოხსნა და 1 ასისტიც დაუმატა. 5 ქულა თად მაკფადენს, 2 ალექსანდრე ფევაძეს, 2 სანდრო სანაძეს, 6 გიორგი კორსანტიას, 4 გიორგი ტურძილაძეს, 7 დუდა სანაძეს, 3 ბექა ბურჯანაძეს, 4 რატი ანდრონიკაშვილს. ერთადერთი კალათბურთელი, რომელმაც ქულის აღება ვერ შეძლო, კახა ჯინჭარაძე იყო.

დღევადნელი მატჩი, საქართველოს ნაკრების შემადგენლობაში ბოლო იყო გიორგი შერმადინისთვის. ვეტერანმა კალათბურთელმა დღეს ეროვნული გუნდის მაისურით 202-ე მატჩი ჩაატარა და ამით, სანაკრებო კარიერა დაასრულა.

საქართველოს ნაკრები საკვალიფიკაციო ეტაპის მომდევნო ორ მატჩს 2026 წლის თებერვალსა და მარტში ჩაატარებს, ორივე შეხვედრას დანიის ნაკრებთან. 27 თებერვალს სტუმრად და 2 მარტს საკუთარ კედლებში. ამ დროისთვის, ალეკსანდარ ჯიკიჩის გუნდს ორიდან ორი მარცხი აქვს და სატურნირო ცხრილში ბოლო ადგილზე იმყოფება.