„ვერ გავიმარჯვეთ, მაგრამ ბედნიერები უნდა ვიყოთ“ - რთული კვირა არტეტასთვის
„სტემფორდ ბრიჯზე“ „ჩელსისა“ და „არსენალს“ შორის გამართული ლონდონური დერბი ფრედ 1:1 დასრულდა, რითაც იქიდან გამომდინარე, რომ 38-ე წუთიდან მოყოლებული რიცხობრივ უმცირესობაში იყვნენ დარჩენილი, უფრო მეტად „არისტოკრატები“ უნდა იყვნენ კმაყოფილები. მსაჯის საფინალო სასტვენის შემდეგ, მედიისთვის კომენტარები ორივე გუნდის მთავარმა მწვრთნელმა გააკეთა და ტრადიციულად, როგორც ენცო მარესკას, ასევე მიკელ არტეტას შეფასების მოსმენა საინტერესო იყო.
ენცო მარესკა
ვფიქრობ, დღეს კიდევ ერთხელ დავამტკიცეთ, რომ სწორი მიმართულებით მივდივართ. თერთმეტი თერთმეტზე თამაშის დროს მეტოქეზე უკეთესად გამოვიყურებოდით. მართალია, კაისედოს გაძევების შემდეგ საგრძნობლად გაგვიჭირდა, თუმცა რთულ სიტუაციას თავი ღირსეულად გავართვით. მძიმე ვითარებაში ვცდილობდით კარგი გადაწყვეტილება მიგვეღო. ერთი სიტყვით, დღეს ვერ გავიმარჯვეთ, მაგრამ ბედნიერები ვართ.
რაც შეეხება კაისედოს გაძევებას, წითელი ბარათი წითელი ბარათია, მაგრამ გარკვეული კითხვის ნიშნები მიჩნდება. რატომ არ გააძევეს „ტოტენჰემის“ ნახევარმცველი როდრიგო ბენტანკური ჩვენთან დაპირისპირების დროს რის ჯეიმსზე უხეშობისას? რატომ არ იყო მისი ქმედება გასაძევებელი და რატომ იყო კაისედო დასჯის ღირსი?!
მიკელ არტეტა
რთული თამაში გამოდგა, რადგან ორივე გუნდი დიდი ინტენსივობისა და აგრესიის ფონზე ასპარეზობდა. თითოეულ ვარდნაში იგრძნობოდა, თუ რამდენად ბევრი რამ იდო სასწორზე და პრემიერლიგის ტოპ-კლუბების დაპირისპირების დროს ეს ჩვეული მოვლენაა. ჩვენს ოთხ მოთამაშეს ყვითელი ბარათი ჰქონდა და მათ წინააღმდეგ „ჩელსის“ ფეხბურთელები განსაკუთრებულად პროვოკაციულად მოქმედებდნენ.
მეორე ნახევრის დასაწყისში კონცენტრაცია დავკარგეთ, რითაც მეტოქემ ისარგებლა და გაგვიტანა. შემდეგ გარკვეული დრო დაგვჭირდა, რათა კონტროლი ისევ დაგვემყარებინა. ბრწყინვალე გოლით ანგარიში გავათანაბრეთ და ორი-სამი კარგი შანსიც შევქმენით. როგორც ემოციურად, ასევე ფიზიკურად რთული კვირა გვქონდა, რადგან ორი მნიშვნელოვანი მოთამაშე დავკარგეთ და მოგვიწია იმ „სტემფორდ ბრიჯზე“ ჩამოსვლა, სადაც „ჩელსიმ“ რამდენიმე დღის წინ „ბარსელონა“ დაამარცხა.
ცნობისათვის, 2021 წლის შემდეგ „ჩელსი“ „არსენალის“ დამარცხებას ვერ ახერხებს. მას შემდეგ ეს გუნდები 8-ჯერ შეხვდნენ, საიდანაც 5-ჯერ „მეთოფეებმა“ გაიმარჯვეს, ხოლო სამ შემთხვევაში ფრე დაფიქსირდა.
