ალეგრი: “მსაჯის შეურაცხყოფა არ მიფიქრია, ის სულ პრობლემას გვიქმნის“

სერი ა-ს მიმდინარე ტურში მილანმა ლაციოს უმასპინძლა და 1:0 დაამარცხა. მატჩის მიწურულს, მოედნიდან მასიმილიანო ალეგრი გააძევეს. ყველაფერი პენალტის განხილვის ეპიზოდს მოყვა.

მატჩის დასრულების შემდეგ, იტალიელმა სპეციალისტმა განმარტა, თუ რის გამო გააძევეს ის მოედანიდან.

ალეგრი:

„ეს ის მსაჯი იყო, რომლის გამოც პირველ წრეში კრემონეზესთან დავკარგეთ ქულები. მე მას უბრალოდ ვკითხე, თუ რატომ ჩნდებოდა ყოველთვის პრობლემები მისი მსაჯობის დროს? მან კი გამაძევა. იმ ქაოსში ბუნებრივი იყო, რომ ასეთი გადაწყვეტილება მიიღო. მე მისი შეურაცხყოფა არ მიფიქრია.

რაც შეეხება მატჩს, თავიდან საკმაოდ გაგვიჭირდა, რადგან ლაციო დიდ ზეწოლას ახდენდა და სწრაფ ტემპს ინარჩუნებდა. სივრცეებს გვიკეტავდნენ და ჩვენ სარისკო პასების გაკეთება გვიწევდა. ასეც ვიქცეოდით და კარგად ვერ ვთამაშობდით.

მეორე ტაიმში სცენარი შეიცვალა. ტემპი ჩვენ გავზარდეთ და მომენტები შევქმენით. ერთ-ერთ მომენტს კი გოლი მოყვა. მინდა მენიო შევაქო, მან დიდებულად ითამაშა.“

შეგახსენებთ, რომ მიმდინარე სეზონში ალეგრის გაწვრთნილი მილანი ჩემპიონობისთვის იბრძვის. ამ მომენტისთვის როსონერის 28 ქულა აქვს და პირველ პოზიციაზე იმყოფება, თუმცა მეორე ადგილზე მყოფ რომას 27 ქულა და 1 მატჩით ნაკლები აქვს ჩატარებული.