მამარდაშვილის ლივერპულის საჩემპიონო შანსები | როგორია Opta-ს ვარაუდი

Opta-მ ინგლისის პრემიერ ლიგის მოახლოებულ სეზონთან დაკავშირებით საკუთარი სუპერკომპიუტერის პროგნოზი გაგვიზიარა. ცნობილი სტატისტიკური სააგენტო ჩემპიონობისთვის ბრძოლაში ორ ფავორიტს გამოყოფს: „არსენალსა“ და „მანჩესტერ სიტის“.

Opta-ს მიხედვით, „მეთოფეებს“ ტიტულის შენარჩუნების 38-პროცენტიანი შანსი აქვთ. მიკელ არტეტას გუნდის შემდეგ „მანჩესტერ სიტი“ მოდის, რომლის ჩემპიონობის ალბათობაც 20.5 პროცენტად ფასდება. მათ გარდა, 10 პროცენტზე მაღალი შანსი არავის აქვს.

გიორგი მამარდაშვილის „ლივერპული“ მესამე ადგილზე იმყოფება — 9.2%. „წითლების“ შემდეგ „მანჩესტერ იუნაიტედი“ (6.2%), „ასტონ ვილა“ (4.8%), „ჩელსი“ (4.1%) და „ტოტენჰემი“ (2.9%) მოდიან. Opta-ს მიხედვით, 39.6 პროცენტია იმის შანსი, რომ „ლივერპული“ ტოპ-4 გუნდს შორის მოხვდება.

ცნობილი სტატისტიკური სააგენტო გავარდნის მთავარ კანდიდატად „ჰალ სიტის“ ასახელებს (38.7%). „ვეფხვების“ შემდეგ „იფსვიჩი“ (31.2%) და „ქოვენთრი“ (27.9%) მოდიან.

გეტყვით იმასაც, რომ პრემიერ ლიგის ახალი სეზონი 21 აგვისტოს, „არსენალისა“ და „ქოვენთრის“ მატჩით გაიხსნება. „ლივერპული“ პირველ შეხვედრას 23 აგვისტოს გამართავს და „ნიუკასლს“ დაუპირისპირდება.