„თითქოს ორგანიზმში გაგვიჯდა, რომ ევროტურნირებზე ვერ გავალთ“ - ფანცულაიასთვის გამოსავალი წნეხის დაძლევაა

Crystalbet ეროვნული საფეხბურთო ლიგის წლევანდელ გათამაშებაში შესაძლოა ერთი ისტორიული ფაქტი დაფიქსირდეს - ბომბარდირთა დავაში „ტორპედოს“ ნორვეგიელი ფორვარდის ბიორნ იონსენის (19 გოლი) მთავარი კონკურენტი გიორგი ფანცულაიაა და თუ „სამგურალის“ თავდამსხმელი მას გადაასწრებს, მოხდება პირველი შემთხვევა, როდესაც ჩვენი ქვეყნის ჩემპიონატში საუკეთესო მეგოლე მამაც იქნება და შვილიც. დიახ, ანალოგიურ შედეგს 90-იან წლებში მამუკა ფანცულაიამაც მიაღწია, რომელიც რამდენიმე წლის წინ გარდაიცვალა და მას შემდეგ გიორგის თითოეული გოლი მამის ხსოვნას ეძღვნება. წყალტუბოს კლუბის 31 წლის ფეხბურთელმა Crystalsport-თან ინტერვიუში Crystalbet ეროვნული საფეხბურთო ლიგის გარდა, საქართველოს ნაკრებსა და ქართულ საკლუბო ფეხბურთში არსებულ პრობლემებზეც ისაუბრა.

გიორგი ფანცულაია

Crystalbet ეროვნული საფეხბურთო ლიგის ბომბარდირობისთვის ბრძოლაში ბიორნ იონსენის სახით საკმაოდ სერიოზული კონკურენტი მყავს. კარგად ვიცი ის ფაქტიც, რომ თუ საუკეთესო მეგოლე გავხდები, მამაჩემის მიღწევას გავიმეორებ და ქართულ ფეხბურთში ჩვენ წილ ისტორიას დავწერთ, რაც უდიდესი მოტივაციაა და მიზნის მისაღწევად ძალ-ღონეს არ დავიშურებ.

„სამგურალთან“ კონტრაქტი წლევანდელი სეზონის ბოლოს მეწურება და ჯერჯერობით არ ვიცი დავრჩები წყალტუბოში, თუ კარიერას სხვა კლუბში განვაგრძობ. რაც შეეხება Crystalbet ეროვნულ ლიგას, ვფიქრობ, ჩვენი ქვეყნის ჩემპიონატი საკმაოდ სანახაობრივია, თუმცა არის რაღაც ნიუანსები, რომლებიც უნდა გამოსწორდეს.

შეგახსენებთ, რომ სულ რაღაც სამიოდე თვის წინ სწორედ აქ თამაშობდა იური ტაბატაძე და ყველა ხედავს, როგორ კარგად ასპარეზობს ესპანეთში, რაც იმას ნიშნავს, მაღალი დონის ფეხბურთელები ჩვენს პირველობაზეც მოიძებნებიან. თუმცა, ყოველივე ეს იმას არ ნიშნავს, რომ ყველაფერი კარგადაა. ფაქტია და ვერსად გავექცევით რომ ვრეგრესირებთ, რადგან ევროტურნირებზე შედეგები წლიდან წლამდე უარესდება.

როგორც სათამაშო, ასევე სავარჯიშო მოედნების პრობლემა საქართველოში ასე თუ ისე არ არსებობს, ჩემპიონატიც როგორც გითხარით სანახაობრივია და აქედან გამომდინარე, ვფიქრობ ევროტურნირებზე უფრო მეტად ფსიქოლოგიური პრობლემების გამო ვერ ვხვდებით. თითქოს ორგანიზმში გაგვიჯდა, რომ საქართველოს წარმომადგენელი ევროპის საკლუბო გათამაშების რომელიმე ჯგუფურ ეტაპზე ვერასოდეს ვერ გავა და რაც უფრო მალე მოვიშორებთ ამ წნეხს, მით უკეთესი იქნება. ვერავინ ვერ დამაჯერებს, რომ „ლევადია“, რომელმაც საქართველოს ჩემპიონი ორი მატჩის ჯამში დაამარცხა, „იბერიაზე“ უკეთესი გუნდია.

რა თქმა უნდა კარგი იქნებოდა ვილი სანიოლი Crystalbet ეროვნული საფეხბურთო ლიგიდანაც იძახებდეს მოთამაშეებს. ტაბატაძეს, როგორცკი „კადისში“ გადავიდა, ნაკრებში უხმეს. არადა, მე თუ მკითხავთ, იური შანსის მიცემას „იბერიაში“ ასპარეზობის დროსაც იმსახურებდა. ველოდები თუ არა სანიოლისგან ყურადღებას? მე ნაკრებში სათამაშოდ მუდამ მზად ვარ, თუმცა გამომიძახებენ თუ არა, ამაზე ფიქრით გონებას არ ვიტვირთავ.

ცნობისათვის, გიორგი ფანცულაიას ანგარიშზე Crystalbet ეროვნულ საფეხბურთო ლიგის მიმდინარე გათამაშებაში ჩატარებულ 33 შეხვედრაში 16 გოლია და როგორც უკვე მოგახსენეთ, ბომბარდირთა დავაში მეორე ადგილზე იმყოფება.