„სწრაფი ნოკაუტით უნდა მოვუგო“ - იანი დვალიშვილზე

UFC-ის სუპერმსუბუქი წონითი დივიზიონის რუსმა მებრძოლმა, პიოტრ იანმა მერაბ დვალიშვილთან მოახლოებულ ჩხუბზე ისაუბრა. იანის თქმით, მისი მიზანი მერაბის სწრაფი დანოკაუტებაა.

„UFC-ში იმისთვის არ მოვსულვარ, რომ ვიღაცას ვასიამოვნო და ხალხმა თქვას, რომ პიოტრი კარგი ბიჭია. ჩემი ოცნებები და მიზნები მაქვს, ხოლო ხალხის აზრი საერთოდ არ მაინტერესებს.

მინდა, დვალიშვილს სწრაფი ნოკაუტით მოვუგო. როდესაც ჩემპიონს სწრაფად აფინიშებ, ყველანაირი კითხვის ნიშნები ქრება და არც სპეკულაციებისთვის რჩება ადგილი. მინდა, დავიბრუნო ქამარი და შური ვიძიო წინა ჩხუბზე. მაქვს ყველაფერი, რაც მერაბის დასამარცხებლად არის საჭირო“.

შეგახსენებთ, რომ ქართველი „მანქანა“ პიოტრ იანს მეორედ დაუპირისპირდება. „მანქანისთვის“ ეს მიმდინარე წელს მეოთხე ჩხუბი იქნება - იანვარში მან უმარ ნურმაგომედოვი, ივნისში შონ ომალი, სექტემბერში კი კორი სენდჰეგენი დაამარცხა.

რაც შეეხება იანს, მერაბთან მარცხის შემდეგ (2023 წლის მარტი) რუსმა მებრძოლმა ზედიზედ სამი ბრძოლა მოიგო - სონგ იადონგთან, დეივისონ ფიგერედოსთან და მარკუს მაკგისთან (სამივე - მსაჯთა ერთსულოვანი გადაწყვეტილებით). მის ანგარიშზე MMA-ში 19 მოგება და 5 მარცხია.

აქვე გეტყვით, რომ დვალიშვილი-იანის დაპირისპირება 7 დეკემბერს გაიმართება და UFC 323-ის მთავარი მოვლენა იქნება.