„მისნაირი შემტევის წინააღმდეგ არასოდეს მითამაშია“ - ლებრონმა იოკიჩზე ისაუბრა

ლებრონ ჯეიმსი პრესის წარმომადგენლებთან იშვიათი კონტაქტით არასოდეს გამოირჩეოდა და ჟურნალისტებს ინტერვიუებს ხშირად აძლევდა. თუმცა, ბოლო პერიოდში საკალათბურთო თემებთან დაკავშირებით მისი მოსაზრებების მოსმენა საკმაოდ ადვილია, რადგან „მეფემ“ საკუთარი პოდკასტი გააკეთა, სადაც პერიოდულად გულშემატკივრების შეკითხვებს პასუხობს და კალათბურთის მოყვარულებს საკუთარ მოსაზრებებს უზიარებს. საინტერესო იყო ლებრონის აზრის მოსმენა ნიკოლა იოკიჩთან დაკავშირებით და მან „დენვერ ნაგეტსის“ ლიდერი საკმაოდ დადებითად დაახასიათა.

რას ამბობს ჯეიმსი

ღმერთო ჩემო, ახლახანს ვესაუბრე ჩემს მეგობარსა და „ნაგეტსის“ სამწვრთნელო შტაბის წევრს ჯარედ დადლის და შევთანხმდით, რომ ნიკოლა იოკიჩი არარეალური შესაძლებლობების პატრონია. მის არსენალში უამრავი რამ არის და პირადად მე, ნიკოლაზე უნივერსალური და დომინანტი შემტევის წინააღმდეგ არასოდეს მითამაშია.

პასები, სროლები, მოხსნები, ყურადღებიანი თამაში დაცვაში. ისეთი კომპონენტი არაფერია, რისი გაკეთებაც მას არ შეუძლია, ერთი ერთზე კი უბრალოდ მომაკვდინებელია. არ მახსენდება სხვა არც ერთი კალათბურთელი, რომელიც დაცვაში იღებს ბურთს და შეუძლია პირდაპირ ცენტრი მოამარაგოს შეტევის დასაწყებად.

ცნობისათვის, მიმდინარე სეზონში ნიკოლა იოკიჩი „დენვერ ნაგეტსის“ შემადგენლობაში საშუალოდ 29,1 ქულას, 12,6 მოხსნას და 11 ასისტს აგროვებს.