გამარჯვება ჩემპიონთა ლიგაზე | შერმადინის გუნდი ჯგუფის ლიდერია

კალათბურთში, ჩემპიონთა ლიგის D ჯგუფის მე-4 ტურში „ტენერიფემ’’ თურქული „ტოფაში’’ მიიღო და დამაჯერებლად 80:70 დაამარცხა. პირველი პერიოდი „ტენერიფემ’’ 18:22 დათმო, თუმცა შემდეგ თამაშში გარდატეხა შეიტანა, მეორე პერიოდი 21:16 მოიგო, მესამე პერიოდი - 20:10, ბოლო პერიოდი „ტოფაშმა'' 1 ქულით მოიგო - 21:22.

„ტენერიფეს’’ სასტარტო ხუთეულში გამოცდილი ქართველი კალათბურთელი გიორგი შერმადინი არ იმყოფებოდა, თუმცა  პარკეტზე 20:31 წუთი გაატარა, 5 ქულა ჩააგდო, 4 მოხსნა და 2 პასი შეასრულა.

4 ტურის შემდეგ „ტენერიფე'' 4 გამარჯვებით ჯგუფის ლიდერია, მე-5 ტურში, 11 დეკემბერს იტალიურ „ტრაპანის'' მიიღებს.

36 წლის გიორგი შერმადინი ოქტომბერში ესპანეთის ჩემპიონატის, ლიგა ენდესას თვის MVP გახდა, რაც მის კარიერაში მეთოთხმეტედ მოხდა.

ლიგა ენდესას მიმდინარე სეზონში „ტენერიფემ’’ 6-დან 5 მატჩი მოიგო, მხოლოდ 1 დათმო, 10 ქულით მეორე ადგილზეა. ამდენივე ქულაა ლიდერ „ვალენსიას’’, „მურსიასა’’ და მადრიდის „რეალის’’ აქტივში. „ტენერიფე’’ მომდევნო მატჩს „ვალენსიასთან’’ 16 ნოემბერს გამართავს.