ძალიან ნიჭიერია, ვეცდებით ეს პრობლემა მოვაგვაროთ | იაშვილმა კაიშვილზე ისაუბრა
საქართველოს 19-წლამდე ნაკრებში მიუნხენის „ბაიერნის’’ საკუთრებაში მყოფი ჯამალ კაიშვილი გამოიძახეს. კრისტალსპორტის ცნობით, პირველ სექტემბერს ასაკობრივი ნაკრების შეკრებაზე გაემგზავრება და ვასილ მაისურაძის ხელმძღვანელობით ივარჯიშებს.
17 წლის შემტევს, რომელიც გროზნოშია დაბადებული, ჯერ ქართული პასპორტი არ აქვს, თუმცა ამ საკითხზე მუშაობა მიმდინარეობს. კრისტალსპორტის ინფორმაციით, ჯამალმა ჯერ რუსეთის მოქალაქეობა უნდა მიიღოს და ამის შემდეგ შეძლებს ქართული პასპორტის მიღებას. ეს ინფორმაცია ფეხბურთელის გარემოცვიდან ვიცით. მისთვის ქართული პასპორტის მიღება მარტივი საკითხი არაა, რთული პროცედურაა.
ჯამალის შესახებ სფფ-ის ვიცე-პრეზიდენტმა ალექსანდრე იაშვილმა ისაუბრა: „ჩვენი მიზანია სხვადასხვა მიზეზის გამო ქვეყნიდან წასული კარგი ფეხბურთელები სამშობლოში დავაბრუნოთ, ნაკრებში ვათამაშოთ. ასეთი ბევრი ფეხბურთელია და იმედი მაქვს, რომ კიდევ ბევრს ვიპოვით. ჯამალს პასპორტთან დაკავშირებით პრობლემა აქვს, თუმცა იმედი მაქვს რომ მოგვარდება.
ძალიან ნიჭიერი ბავშვია, „ბაიერნის'' აკადემიაში შემთხვევით ვერ ხვდებიან, დედით ქართველია. საქართველოს პირველად ეწვევა, ქვეყანას გაიცნობს, ვასილ მაისურაძე ვარჯიშებზე დააკვირდება. ვეცდებით, რომ ნოემბრის შესარჩევისთვის მოვასწროთ საბუთების მოგვარება. ის ამჟამად არცერთი ქვეყნის მოქალაქე არაა.”
ჯამალის ერთ-ერთი საყვარელი ფეხბურთელი ხვიჩა კვარაცხელიაა. გასულ წელს ხვიჩამ ჯამალს Adidas-ის ბუცები უსახსოვრა.
კრისტალსპორტის ინფორმაციით, გასულ ზაფხულში ჯამალმა „ბაიერნთან’’ ახალი კონტრაქტი 2027 წლამდე გაახანგრძლივა და კლუბმა ერთი სეზონით რანგით მე-5 ლიგის „ტურკგიუჯუ მიუნხენში’’ გაანათხოვრა. ფეხბურთელის სურვილია ხშირად ითამაშოს და ის ფსიქოლოგიური თავდაჯერება დაიბრუნოს, რაც ტრავმების მიღებამდე ჰქონდა. ჯამალს ტრავმების გამო დაახლოებით 1 წელი გაუცდა, ჯერ ფიბულას მოტეხილობა დაუდგინდა, შემდეგ კი პუბისის ძვლის ანთება ჰქონდა. საკმაოდ რთული პერიოდი გაიარა, ახლა ყველაფერი კარგადაა, ტრავმები სრულად მოირჩინა, თამაშისთვის მზადაა. კრისტალსპორტმა 2023 წლის ზაფხულში გაცნობათ, რომ ჯამალმა საქართველოს ნაკრებში თამაში გადაწყვიტა. ამავე წლის დეკემბერში ჯამალის შესახებ ვრცელი სტატია დავწერე, რომელიც შეგიძლიათ იხილოთ:
თავშესაფრიდან ბაიერნამდე - ჯამალ კაიშვილის შთამაგონებელი ისტორია
