ახალი ფურცლის გადაშლის დროა | კვეკვესკირმა ფეხბურთელის კარიერა დაასრულა

ნიკა კვეკვესკირმა საფეხბურთო კარიერა დაასრულა. ამის შესახებ 33 წლის ქართველმა ნახევარმცველმა პრესკონფერენციაზე განაცხადა, რომელსაც ვილი სანიოლი და ალექსანდრე იაშვილიც ესწრებოდნენ.

კვეკვესკირი: „საფეხბურთო კარიერის დასრულების გადაწყვეტილება მივიღე. მინდოდა რომ ეს ჩემგან გაჟღერებულიყო. მადლობა თანაგუნდელებს, მწვრთნელებს და ყველას, ვისთან ერთადაც მიმუშავია. მადლობა ფეხბურთის ფედერაციას და ყველა თანამშრომელს. დიდი პატივი იყო რომ საქართველოს ნაკრების მაისური 60-ზე მეტ შეხვედრაში მეტარებინა. გადაწყვეტილება რთული იყო, მაგრამ დგება მომენტი, როცა ცხოვრებაში ახალი ფურცელი იშლება. ჩემი წარმატების მიზეზი თქვენც ხართ ჟურნალისტები, წარმატებას ერთად მივაღწიეთ. დარწმუნებული ვარ, წინ დიდი წარმატებები ელოდება საქართველოს ნაკრებს. სასურველ დონეზე თამაშს და სიამოვნების მიღებას ვეღარ ვახერხებდი. ამის გამო გადავწყვიტე კარიერის დასრულება. სამწვრთნელო საქმის არანაკლები ინტერესი მაქვს. ნაკრებთან ერთდ დიდ წარმატებას მივაღწიე და ბედნიერი ვარ''.

ვილი სანიოლი: „მას ვულოცავ წარმატებულ კარიერას და საბერძნეთთან გატანილ პენალტს, რომლითაც ევროპის ჩემპიონატზე გავედით, მასთან ყველა ვალში ვიქნებით. კვეკვე ახალი ეტაპისთვის ემზადებოდა, მასთან ვისაუბრეთ და ის ჩვენს სამწვრთნელო შტაბში იქნება. ეს ჩვენთვის ძალიან სასიხარულოა.“. 

ალექსანდრე იაშვილი: „კვეკვე მოედანზე და მოედნის გარეთ ყოველთვის სამაგალითო იყო. ევროპის ჩემპიონატზე გასვლაში, ნაკრების წარმატებაში მისი როლი ძალიან დიდია. ნიკა ნაკრების ისტორიაში ყველაზე მნიშვნელოვანი გოლოს ავტორი გახდა, მან ეს დაიმსახურა“.

შეგახსენებთ, რომ კვეკვესკირმა ეროვნული ნაკრების შემადგენლობაში 62 მატჩი ჩაატარა.