ბოტაფოგოს მწვრთნელი: პსჟ-ს მათივე იარაღით მოვუგეთ

„პარი სენ-ჟერმენმა“ მსოფლიოს საკლუბო ჩემპიონატზე ჯგუფური ეტაპის მეორე შეხვედრა გამართა. „ატლეტიკოს“ განადგურების შემდეგ, ხვიჩა კვარაცხელიას გუნდი „ბოტაფოგოს“ დაუპირისპირდა და მატჩი ბრაზილიელთა გამარჯვებით დასრულდა - 1:0.

მატჩის შემდეგ„ბოტაფოგოს“ მთავარმა მწვრთნელმა, რენატო პაივამ თავისი გუნდის თამაში შეაფასა.

„პსჟ-ს მათივე იარაღით მოვუგეთ - ვითამაშეთ, როგორც ერთიანმა გუნდმა - ერთად ვიცავდით თავს და ერთად ვუტევდით. ამაშია პსჟ-ს საიდუმლო - ისინი გუნდური თამაშის წყალობით იგებენ. პსჟ არის გუნდი, რომელიც საფეხბურთო მსოფლიოსთვის მაგალითია. ჩემს მოთამაშეებს ვუთხარი: უბრალოდ იყავით გუნდი, ისიამოვნეთ, ერთად ითამაშეთ, ერთად შეუტიეთ და ერთად იყავით დაცვაში. ჩვენ ვანახეთ ბრაზილიური ფეხბურთელებისა და მწვრთნელების ხარისხი“, - თქვა პორტუგალიელმა სპეციალისტმა.

ცნობისთვის, ლუის ენრიკეს გუნდს 3 ქულა დარჩა და ამ მომენტისთვის, მეორე ადგილზე იმყოფება. ბოლო ტურში, პარიზელთა მეტოქე „სიეტლ საუნდერსია“, რომელსაც 23 ივნისს დაუპირისპირდება. მატჩი თბილისის დროით, 23:00-ზე დაიწყება.

რაც შეეხება „ბოტაფოგოს“, ბრაზილიური კლუბი მომდევნო მატჩს ასევე 23 ივნისს გამართავს და „ატლეტიკოს“ დაუპირისპირდება.