ანჩელოტი: “ჩვენს საუკეთესო ვერსიას მალე იხილავთ“

ლა ლიგის მორიგ ტურში მადრიდის რეალმა ბეტისს უმასპინძლა და კილიან მბაპეს დუბლის წყალობით 2:0 დაამარცხა.

მატჩის დასრულების შემდეგ, სამეფო კლუბის მთავარმა მწვრთნელმა კარლო ანჩელოტიმ ჟურნალისტებთან ისაუბრა.

ანჩელოტი:

„ორი წარუმატებელი მატჩის შემდეგ, ვნერვიულობდით და იმედგაცრუებულები ვიყავით, მაგრამ უკეთესობისკენ წავედით, სამი ქულა ავიღეთ და შესვენებაზე კარგი განწყობით მივდივართ. ზეწოლა კილიანზე? ეს მას უნდა ჰკითხოთ. ჩვენ მასზე ზეწოლას არასდროს ვახდენთ. მბაპემ კარგად ითამაშა. ვფიქრობ, გოლის გატანა მისთვის მნიშვნელოვანი იყო, მაგრამ ჩვენ გუნდურ შრომას უფრო ვაფასებთ.

ვინისიუსის და როდრიგოს საშუალებით ფლანგის გაწელვას ვცდილობდით. პირველ ტაიმში კარგი განცდა მქონდა, მაგრამ მიმართულების შეცვლა გაგვიჭირდა. მეორე ნახევარი კარგი გამოვიდა. ჩვენს საუკეთესო ვერსიას მალე იხილავთ. ვინი ძალიან ალტრუისტი იყო, როდესაც მბაპეს პენალტის დარტყმის საშუალება მისცა. მას და როდრიგოს კარგი ურთიერთობა აქვთ.“

შეგახსენებთ, რომ 4 ტურის შემდეგ, სამეფო კლუბს 8 ქულა აქვს და სატურნირო ცხრილში მეორე ადგილზე იმყოფება. პირველ პოზიციაზე მყოფ ბარსელონას 4 ქულით ჩამორჩება. შემდეგ ტურში, ბლანკოსი სოსიედადს ესტუმრება.