„ბედნიერი ვარ, რომ ასეთი თავდამსხმელები მყავს“ - ენრიკე ბრესტთან გამარჯვების შემდეგ

საფრანგეთის ლიგა 1-ის მე-4 ტურში, „პარი სენ-ჟერმენი“ სტუმრად „ბრესტს“ დაუპირისპირდა და მინიმალური სხვაობით, 1:0 დაამარცხა. ერთადერთი გოლი მე-5 წუთზე ფერან ტორესმა უსმან დემბელეს ასისტით გაიტანა.

შეხვედრის დასრულების შემდეგ პსჟ-ს მთავარმა მწვრთნელმა, ლუის ენრიკემ განვლილი მატჩი შეაფასა.

რა თქვა ენრიკემ:

„იმ სამ თამაშში, რომლებიც ვერ მოვიგეთ, გაცილებით უკეთ ვიასპარეზეთ, ვიდრე დღევანდელ მატჩში. ბევრი შეცდომა დავუშვით. თამაში კარგად დავიწყეთ, მაგრამ გავაკეთეთ ორი ისეთი მოქმედება, რასაც, როგორც წესი, არ ვაკეთებთ ხოლმე. რთული იყო. ფეხბურთი ასეთია. ზოგჯერ ის უსამართლოა, დღეს კი ჩვენ მოვიპოვეთ სამი ქულა. კმაყოფილები ვართ, მაგრამ გაუმჯობესება გვჭირდება.

ფერან ტორესისა და უსმან დემბელეს შეთამაშება? ვფიქრობ, სამივე თავდამსხმელისთვის რთული მატჩი იყო. ვეცადეთ თავი სხვა კუთხით წარმოგვეჩინა, ვიდრე ამას ჩვეულებრივ ვაკეთებთ. არ მინდა მხოლოდ ორ ან სამ მოთამაშეზე ვისაუბრო, უბრალოდ ძალიან ბედნიერი ვარ, რომ ასეთი დონის თავდამსხმელები მყავს. მათთვის რთული იქნება მუდმივად თამაში, ეს შეუძლებელიც კია, რადგან წინ ბევრი მატჩია. როდესაც ჩვენნაირ გუნდს ყველა ტიტულის მოგება სურს, გუნდში ბევრი ალტერნატივა უნდა გქონდეს.

კმაყოფილი ვარ. რა მომეწონა? არაფერი. ჩემი ფეხბურთელებისგან გაცილებით მეტს მოველი. როცა გინდა ისეთი სტილით იგებდე, როგორც ჩვენ გვსურს, თამაში მეტად უნდა აკონტროლო. ამ მატჩში იყო ეპიზოდები, როცა ბურთი არ გვქონდა და მეტოქემ პრობლემები შეგვიქმნა. თუ გსურს, რომ თამაშები ჩვენი სტილით მოიგო, ყველა მოთამაშემ უნდა გააუმჯობესოს საკუთარი თამაში - მწვრთნელმაც.

რაც შეეხება აშრაფს, ხვალამდე უნდა დაველოდოთ, რომ მეტი გავიგოთ. იმედი მაქვს, სერიოზული არაფერია, მაგრამ ამ ეტაპზე რაიმეს თქმა რთულია. ექიმი თავის დასკვნას ხვალ დადებს“.

4 ტურის შემდეგ პსჟ ლიგა 1-ის სატურნირო ცხრილში 5 ქულით მე-7 პოზიციას იკავებს და მომდევნო შეხვედრას 20 აპრილს, სტუმრად, „მარსელის“ წინააღმდეგ გამართავს.