ბითაძის 2 ქულა - ორლანდომ ტორონტოს მოუგო

ნაციონალური საკალათბურთო ასოციაციის რეგულარული გათამაშების მორიგ ტურში „ორლანდო“ სანდრო მამუკელაშვილის ყოფილ გუნდს „ტორონტოს“ დაუპირისპირდა და 7-ქულიანი სხვაობით, 121:114 გაიმარჯვა. გოგა ბითაძემ სამწუხაროდ ამჯერადაც მცირე სათამაშო დრო მიიღო, რაც მის შედეგიანობაშიც აისახა. თუმცა, ისიც უნდა აღინიშნოს, რომ ფლორიდელთა ქართველმა კალათბურთელმა ერთ-ერთ ეპიზოდში კოლინ მიურე-ბოილსთან შეჯახებისას ფეხის ტრავმა მიიღო და შესაძლოა ამის გამოც დაასვენა მწვრთნელმა და ზედმეტ რისკს მოერიდა.

„მეჯიქის“ ქართველი ლეგიონერი შეხვედრაში სათადარიგო სკამიდან ჩაერთო და 6 წუთში 2 ქულა, 4 მოხსნა და 1 დაფარება დააგროვა. საშუალო დისტანციიდან ბითაძის 3 ტყორცნიდან ზუსტი 1 აღმოჩნდა, ხოლო საჯარიმოს ხაზიდან და პერიმეტრიდან ერთხელაც არ უსვრია. ოთხიდან სამ შემთხვევაში გოგამ მოხსნა დაცვაში ასპარეზობის დროს შეასრულა, ბურთი ერთხელაც არ დაუკარგავს და ერთი პერსონალური ჯარიმა მიიღო.

ცნობისათვის, 2 მოგებითა და 3 წაგებით „ორლანდო“ აღმოსავლეთ კონფერენციის სატურნირო ცხრილში მეცხრე ადგილზეა. მომდევნო შეხვედრას გოგა ბითაძე და მისი თანაგუნდელები საკუთარ დარბაზში კონფერენციის ერთ-ერთ საუკეთესო კლუბთან, „ბოსტონ სელტიქსთან“ ჩაატარებენ და მატჩი თბილისის დროით, ხვალ, ღამის პირველის ნახევარზე დაიწყება.