„ჰოლოუეის დაამარცხებს, ძალიან ძლიერია“ | სენდჰეგენმა ილია შეაქო
UFC-ის სუპერ მსუბუქი წონითი დივიზიონის მებრძოლმა, კორი სენდჰეგენმა ილია თოფურია შეაქო. „სენდმენმა“ განაცხადა, რომ „ელ მატადორი“ ქვემსუბუქ წონით დივიზიონში ერთ-ერთი საუკეთესო მებრძოლია და შეუძლია, ორი წონითი დივიზიონის ჩემპიონი გახდეს.
„ჩემი აზრით, ქვემსუბუქ წონით დივიზიონში ილია ერთ-ერთი ყველაზე გამორჩეული მებრძოლი და ერთ-ერთი საუკეთესო ჩემპიონია. მაქს ჰოლოუეი ძალიან მიყვარს, მაგრამ სამწუხაროდ, მგონია, რომ თოფურია მას დაამარცხებს. მათ ბრძოლაში მხოლოდ ამ შედეგს ვხედავ.
ილია ძალიან კარგი მებრძოლია. თოფურია, დიდი ხნის განმავლობაში იქნება ჩემპიონი, რომლის დამარცხებაც ქვემსუბუქი წონის დივიზიონის ყველა მებრძოლისთვის ურთულესი ამოცანა იქნება. ელ მატადორს შეუძლია, წონა მოიმატოს და მსუბუქ წონაში ავიდეს, სადაც ასევე მაღალ დონეზე იასპარეზებს“.
შეგახსენებთ, რომ UFC 304-ის შემდეგ, UFC-იმ Pound-for-pound რეიტინგი (რეიტინგი წონის გაუთვალისწინებლად, ორგანიზაციის საუკეთესო მებრძოლები) განაახლა. ცვლილებები პირველ ქართველ ჩემპიონსაც შეეხო და ილია თოფურია ერთი საფეხურით დაწინაურდა. „ელ მატადორი“ მეხუთე გახლდათ, განახლებულ რეიტინგში კი მეოთხე პოზიციას იკავებს.
