2009 წლის საქმე - მაიორგა რონალდუს ძალადობაში კვლავ ადანაშაულებს

კეტრინ მაიორგა, რომელმაც კრიშტიანუ რონალდუ გაუპატიურებაში დაადანაშაულა, კვლავ კომპენსაციას ითხოვს.

პროცესი 2018 წლის სექტემბერში დაიწყო, მას შემდეგ რაც მოდელმა 2009 წლის ივნისში სასტუმროში გაუპატიურების შესახებ საჩივარი შეიტანა. მაიორგა ამტკიცებდა, რომ რონალდუსგან დუმილის სანაცვლოდ 375 000 დოლარი მიიღო. მოგვიანებით პორტუგალიელმა თანხის გადარიცხვის ფაქტი აღიარა, თუმცა გაუპატიურების ფაქტი კატეგორიულად უარყო. მისი ადვოკატები ამტკიცებდნენ, რომ სექსუალური ურთიერთობა იყო კონსენსუალური და ამტკიცებდნენ, რომ გაუმჟღავნებლობის შესახებ შეთანხმება მაიორგას ამ მოვლენებზე საუბარს უკრძალავდა.

2020 წლის ოქტომბერში მოდელმა რონალდუსთან სასამართლო პროცესის განახლება სცადა.

2021 წლის აპრილში მაიორგამ რონალდუსგან 65 მილიონი ევრო მოითხოვა გაუპატიურების გამო მორალური ზიანის ანაზღაურების სახით, რისი ფაქტიც არ დადასტურდა. 2022 წლის ივნისში მისი სარჩელი უარყოფილ იქნა. მოსამართლე ჯენიფერ დორსიმ სარჩელი არ დააკმაყოფილა, მიზეზი კი მომჩივანი მხარის არაკეთილსინდისიერი საქციელისა და მოპარული კონფიდენციალური დოკუმენტების გამოყენება იყო.

ახლა მაიორგას იურიდიული გუნდი აშშ-ის მე-9 სააპელაციო სასამართლოს სთხოვს, გააუქმოს საქმის განხილვა და განაახლოს სარჩელი, რომელიც მაიორგამ პირველად ნევადაში 2018 წელს შეიტანა.

ყოფილი მოდელის ადვოკატები ამტკიცებენ, რომ ნევადის ფედერალური სასამართლოს მოსამართლემ შეცდომა დაუშვა.