შტურმი ავსტრიის თასის ფინალშია | კიტეიშვილი მე-60 წუთზე შეიყვანეს

ოთარ კიტეიშვილის „შტურმი“ ავსტრიის თასის ფინალში გავიდა. ქართველი ფეხბურთელის გუნდმა ნახევარფინალში „ლასკს“ მინიმალური ანგარიშით, 1:0 სძლია და გადამწყვეტ შეხვედრაში თამაშის უფლება მოიპოვა, რომელშიც „რაპიდს“ დაუპირისპირდება.

„შტურმისა“ და „ლასკის“ მატჩი დაახლოებით 30-წუთიანი დაგვიანებით დაიწყო. ავსტრიული პრესის ინფორმაციით, ტრიბუნებზე მყოფ ერთ-ერთ გულშემატკივარს გულის შეტევა დაემართა, სამედიცინო დახმარება დასჭირდა და დაგვიანებული სტარტი ამან განაპირობა.

პირველი ტაიმი თანაბარ ბრძოლაში წარიმართა, თუმცა უფრო სახიფათოდ „ლასკი“ უტევდა და „შტურმი“ გაშვებული გოლისგან ძელმა 2-ჯერ იხსნა. შეხვედრის ერთადერთი გოლი მეორე ტაიმში გავიდა და მისი ავტორი ტომი ჰორვატია, რომელმაც მეტოქის კარი ლამაზი დარტყმით აიღო.

კიტეიშვილს რაც შეეხება, ოთარმა მატჩი სათადარიგოთა სკამზე დაიწყო და მოედანზე მე-60 წუთზე გამოჩნდა, როცა ანგარიში 0:0 იყო. ქართველ ფეხბურთელს 66-ე წუთზე მინი მომენტი ჰქონდა, მაგრამ მისი დარტყმა მეკარემ მოიგერია, 85-ზე კი ყვითელი ბარათი მიიღო.

ცნობისთვის, „შტურმისა“ და „რაპიდის“ ფინალური შეხვედრა 30 აპრილს გაიმართება. გრაცელებს ავსტრიის თასი 2018 წლის შემდეგ არ მოუგიათ, „რაპიდი“ კი ამ ტიტულს ბოლოს 1995 წელს დაეპატრონა.