„ლიგაზე ყოველთვის გადამწყვეტ როლშია, წნეხი მასზე დადებითად მოქმედებს...“
ჩემპიონთა ლიგაზე „ჩელსისთან“ მატჩის შემდეგ, ხვიჩა კვარაცხელიას შესახებ ევროპული პრესა შეუჩერებლად წერს და მის მიმართ საქებარი სიტყვებით არ იღლება. გამონაკლისი არც Goal Italia გახლავთ, რომელიც ქართველის თამაშს გამოეხმაურა და მას ვრცელი სტატია მიუძღვნა, სადაც მისი შესაძლებლობები, ხასიათი და მომავალია განხილული.
„ნაპოლის“ ყოფილ თავდამსხმელს დიდ საფეხბურთო საღამოებთან დაკავშირებული წნეხი არა მხოლოდ ვერ თრგუნავს, არამედ პირიქით - მასზე დადებითად მოქმედებს: პარიზელთა რიგებში ჩატარებულ ჩემპიონთა ლიგის ბოლო 11 მატჩში მან 11 გოლში მიიღო მონაწილეობა.
არსებობენ ფეხბურთელები, რომლებიც თავს საუკეთესოდ შიდა ჩემპიონატში ან შედარებით დაბალი წნეხის პირობებში წარმოაჩენენ და ემოციებს უკეთ მართავენ. მაგრამ არიან სხვებიც, მაგალითად ხვიჩა კვარაცხელია, რომლებიც ჩემპიონთა ლიგის ჰიმნის გაჟღერებისთანავე სხვა სიჩქარეზე გადადიან და დიდი მოვლენებით სულდგმულობენ.
„ჩელსის“ წინააღმდეგ მატჩის ბოლო წუთებზე შესრულებული დუბლი, რომელმაც გუნდი მეოთხედფინალთან ერთი ნაბიჯით დააახლოვა, „პსჟ“-ს თავდამსხმელის კიდევ ერთი ბრწყინვალე პერფორმანსია ევროპის საუკეთესო საკლუბო ტურნირზე. მან თამაში ძირითად შემადგენლობაში არ დაიწყო, რადგან ლუის ენრიკემ არჩევანი ბარკოლას, დუესა და დემბელეს ტრიოზე შეაჩერა. თუმცა, მოედანზე გატარებულ სულ რაღაც ნახევარ საათში, კვარაცხელიამ მატჩის სურათი სრულიად შეცვალა.
ჯერ იყო საგოლე გადაცემა ვიტინიასთვის, რომელმაც ანგარიში 3:2 გახდა, შემდეგ კი საჯარიმოს გარედან გატანილი გოლი, რამაც მატჩის დასრულებამდე რამდენიმე წუთით ადრე ანგარიშში სხვაობა ორამდე გაზარდა (4:2). დასრულდა? რა თქმა უნდა, არა. როდესაც მსაჯის მიერ დამატებული დრო იწურებოდა, შეხვედრის ბოლო მომენტში, „ნაპოლის“ ყოფილმა მოთამაშემ ჰაკიმის დაბალ ჩაწოდებას ერთი შეხებით უპასუხა და საბოლოო ანგარიში - 5:2 დააფიქსირა.
31 მაისის ფინალში „ინტერის“ წინააღმდეგ გატანილი გოლიდან დაწყებული, „ჩელსისთან“ შესრულებული დუბლით დამთავრებული - კვარაცხელია ჩემპიონთა ლიგაზე პრაქტიკულად ყოველთვის გადამწყვეტ როლს თამაშობს.
ბოლო 11 შეხვედრაში ქართველმა 11 გოლში მიიღო მონაწილეობა (7 გოლი და 4 საგოლე გადაცემა). ეს იმის მკაფიო ნიშანია, რომ როდესაც ჩემპიონთა ლიგის ჰიმნი გაჟღერდება, მასში რაღაც იღვიძებს... პარიზელები კი ამით დიდ სარგებელს იღებენ.
სულ რაღაც ერთი წლის წინ კვარაცხელიამ ნეაპოლი და იტალია დატოვა და მოულოდნელად „პსჟ“-ში გადავიდა. არსებობდა შიში, რომ ადაპტაციის პერიოდი გარდაუვალი იქნებოდა, თუმცა მისი პირველი თვეები საფრანგეთში პრაქტიკულად ზღაპარს ჰგავს. ტრიუმფი ლა ლიგა 1-სა და საფრანგეთის თასზე, წარმატება ჩემპიონთა ლიგაზე, გამარჯვება პენალტების სერიაში „ტოტენჰემთან“ ევროპის სუპერთასზე. ერთადერთი მტკივნეული მარცხი 13 ივლისს, მსოფლიო საკლუბო ჩემპიონატის ფინალში „ჩელსისთან“ (0:3) განიცადა.
კვარაცხელია საფრანგეთის თასიდან გამოვარდნის გამო „ტრებლს“ (სამივე ტიტულის მოგებას) ვეღარ შეწვდება, თუმცა სეზონის ყველა სხვა მიზნისთვის ბრძოლას აგრძელებს.
ოქროს ბურთის მომავალი კანდიდატი?
2025 წლის „ოქროს ბურთის“ ნომინანტებს შორის მან მე-12 ადგილი დაიკავა, თუმცა არსებობს განცდა, რომ მომავალში ეს პოზიცია მისთვის ძალიან არადამაკმაყოფილებელი აღმოჩნდება.
„პსჟ“-ს თავდამსხმელს ყველა მონაცემი აქვს იმისთვის, რომ მყარად დამკვიდრდეს საუკეთესო ათეულში, ხოლო თუ ამ დონეზე თამაშს გააგრძელებს, რეალურად შეძლებს საუკეთესო ხუთეულისთვის ბრძოლას.
კონკურენცია თანაგუნდელებთან - დემბელედან ვიტინიამდე, ჰაკიმიდან ნუნუ მენდეშამდე. ბრძოლა ისეთ დიდ ჩემპიონებთან, როგორებიც იამალი და მბაპე არიან, ჯერ კიდევ წინაა (ღიაა), თუმცა ქართველი გენიოსისთვის, როგორც ჩანს, ზღვარი არ არსებობს“.
- წერს იტალიური გამოცემა.
