შენგელიას ცუდი მატჩი - ვირტუს ბოლონიამ თურქეთში წააგო
თორნიკე შენგელიას „ვირტუს ბოლონია“ ევროლიგაზე ზედიზედ მეოთხედ დამარცხდა. ქართველი კალათბურთელის გუნდმა მორიგი მატჩი „ანადოლუ ეფესის“ წინააღმდეგ გამართა და უშანსოდ წააგო. იტალიურმა კლუბმა მეტოქეს წინააღმდეგობა მხოლოდ პირველ მეოთხედში გაუწია, რომელიც 13:13 დასრულდა. თურქებმა მეორე მეოთხედი 9 ქულით, მესამე კი 13 ქულით მოიგეს და საქმის ბოლომდე მიყვანა არ გასჭირვებიათ - 86:67.
შენგელიამ პარკეტზე 17 წუთი და 37 წამი გაატარა და ცუდი თამაში ჰქონდა. თორნიკემ 3 ქულა, 3 მოხსნა და 3 შედეგიანი გადაცემა გაიფორმა. ქართველმა კალათბურთელმა 2-დან 1 ორქულიანი და 2-დან 1 საჯარიმო ჩააგდო. 1 სამიანი გააცუდა, 3 ჯარიმა მიიღო და 4 დაკარგვა ჰქონდა.
SCONFITTA ❌
— Virtus Segafredo Bologna (@VirtusSegafredo) March 30, 2023
La Virtus lotta nel primo tempo per poi arrendersi nel secondo all’Efes
???? Mannion 17, Ojeleye 13, Mickey 11, Belinelli 10#AmoreInfinito #EveryGameMatters pic.twitter.com/3vX6WLtSjs
„ვირტუს ბოლონიას“ რიგებში ყველაზე მეტი, 17 ქულა ნიკოლო მანიონიმ ჩააგდო. სემი ოჯელეის 13 ქულა ჰქონდა, ჯორდან მიკის - 11. „ანადოლუ ეფესს“ 24 ქულით ანტე ზიზიჩმა ულიდერა. ტიბორ პლაისმა 14 ქულა გააკეთა, ხოლო როდრიგო ბობოამ - 10.
ცნობისთვის, შენგელიას „ვირტუს ბოლონიას“ ევროლიგაში 32-დან 13 შეხვედრა აქვს მოგებული და პლეიოფში გასვლის შანსი დაკარგა. იტალიური კლუბი მომდევნო შეხვედრას 2 აპრილს გამართავს და „ტრიესტეს“ დაუპირისპირდება.
