მეკარის ასისტი და 8 გოლი - მოქმედმა ჩემპიონმა მხიარული მატჩი მოიგო

კრისტალბეთ ეროვნულ ლიგაში სტარტი აიღო მესამე ტურის თამაშებმა. დღის პირველი მატჩი თბილისის ზღვის ბაზაზე მდებარე ზესტაფონის საწვრთნელ ბაზაზე გაიმართა, რომელშიც „გაგრამ“ საქართველოს მოქმედ ჩემპიონს, თბილისის „დინამოს“ უმასპინძლა და სანახაობრივ დაპირისპირებაში 3:5 დამარცხდა.

სტადიონზე შეკრებილმა გულშემატკივარმა 8 გოლი იხილა, აქედან 5 „გაგრას“, 3 კი „დინამოს“ კარში. გიორგი ჭიაბრიშვილის ფეხბურთელები 5:1-საც იგებდნენ, თუმცა მასპინძლებმა სხვაობით ორბურთამდე შემცირება შეძლეს.

ანგარიში მე-9 წუთზე იმრანმა გახსმა, რომელმაც თორნიკე კირკიტაძის პასი გამოიყენა. 39-ე წუთზე, „გაგრას“ ბრაზილიელმა ლეგიონერმა, მათეუს მარკონდელემ წონასწორობა აღადგინა, თუმცა მალევე „დინამომ“ კიდევ ერთხელ შეძლო დაწინაურება, თავი კი ამჯერად უსმანე კამარამ გამოიჩინა.

მეორე ტაიმის დებიუტში ჭიაბრიშვილის გუნდმა ორწუთიან მონაკვეთში ორი გოლის გატანა შეძლო, რამაც მატჩის მიმდინარეობაზე გადამწყვეტი გავლენა მოახდინა. „გაგრას“ კარი 46-ე წუთზე ჯერ ზორან მარუშიჩმა აიღო, 48-ე წუთზე კი თავი გაბრიელ სიგუამ გამოიჩინა. საგულისხმოა, რომ მარუშიჩის გოლის ეპიზოდში საგოლე გადაცემა თბილისური კლუბის მეკარემ ლუკა კუტალაძემ შეასრულა, რომელმაც სერბ ფეხბურთელს საკუთარი საჯარიმოდან გაატანინა. „გაგრას“ კარში ბოლო გოლი 55-ე წუთზე, უსმანე კამარამ გაიტანა, რომლემაც შეხვედრაში დუბლის შესრულება შეძლო. მასპინძელთა რიგებიდან დუბლი მიითვალა „გაგრას“ ფეხბურთელმა თეიმურაზ შონიამ, რომელმაც საკუთარი გუნდი გამანადგურებელი სხვაობით მარცხს გადაარჩინა. შონიამ ჯერ 74-ე წუთზე შეძლო „დინამოელთა“ კარის აღება, 82-ე წუთზე კი ლუკა კუტალაძის კარში მეორე გოლიც გაიტანა და საბოლოო ანგარიში, 3:5 დააფიქსირა.

3 ტურის შემდეგ, თბილისის „დინამოს“ 9 ქულა აქვს და სატურნირო ცხრილში პირველ ადგილზე იმყოფება, „გაგრა“ კი 1 ქულით ჯერჯერობით მე-7 ადგილს იკავებს. თბილისელი ფეხბურთელები მომდევნო ტურში წყალტუბოს „სამგურალს“ დაუპირისპირდებიან, „გაგრას“ მეტოქე კი ქუთაისის „ტორპედო“ იქნება.