„ძალიან მოტივირებული ვარ“ - ტედესკომ ბელგიის ნაკრები ჩაიბარა
ბელგიის ნაკრებს ახალი მთავარი მწვრთნელი ჰყავს. „წითელმა ეშმაკებმა“ ოფიციალურად დაადასტურეს, რომ ეროვნულ გუნდს დომენიკო ტედესკო უთავკაცებს. 37 წლის სპეციალისტი პოსტზე ევროპის 2024 წლის ჩემპიონატის ბოლომდე დარჩება.
Domenico Tedesco is the new head coach of our Devils. Good luck, coach! ???????????? #DEVILTIME pic.twitter.com/KeHHPbVpB3
— Belgian Red Devils (@BelRedDevils) February 8, 2023
„ბელგიის ფეხბურთის ფედერაციასთან გამართული პირველი საუბრის შემდეგ, ვიგრძენი, რომ ყველაფერი კარგად იყო და მაშინვე მივხვდი, რომ ერთ ტალღაზე ვიყავით. ძალიან მოტივირებული ვარ და მოუთმენლად ველი მომენტს, როცა სამუშაოს შევუდგები. ბელგიის ნაკრების მთავარი მწვრთნელის პოსტზე დანიშვნა ჩემთვის ძალიან დიდი პატივია“.
შეგახსენებთ, რომ ტედესკოს სამწვრთნელო კარიერა „აუეში“ დაიწყო. 2017-19 წლებში, იგი „შალკეს“ წვრთნიდა, საიდანაც მოსკოვის „სპარტაკს“ მიაშურა. ბოლოს იგი „ლაიპციგში“ მუშაობდა და გერმანულმა კლუბმა იგი 2022 წლის 7 სექტემბერს გაათავისუფლა.
ცნობისთვის, ბელგიის ნაკრების ბოლო მწვრთნელი რობერტო მარტინესი გახლდათ. ამ უკანასკნელმა გაცემული ავანსები ვერ გაამართლა და მსოფლიო ჩემპიონატზე განცდილი ფიასკოს შემდეგ, პოსტი დატოვა.
