ბითაძის ინდიანაში დარჩენის შანსი მცირეა - გოგას ახალ კლუბს მოუძებნიან

NBA-ში ტრეიდებისთვის განკუთვნილი ვადა 9 თებერვალს იწურება. ამერიკული პრესის ცნობით, ერთ-ერთი კალათბურთელი, ვინც ადგილსამყოფელს გამოიცვლის, „ინდიანა პეისერსის“ ქართველი ცენტრი, გოგა ბითაძეა. რამდენიმე წუთის წინ, „პეისერსის“ გეგმებს სტატია Indystar-მა მიუძღვნა და ბითაძეზეც ისაუბრა.

„ინდიანა პეისერსის 2019 წლის პირველი რაუნდის პიკის, გოგა ბითაძის სახელი ჯექსონის, სმიტისა და ტაისის გამო, დავიწყებას მიეცა. მიმდინარე სეზონის ბოლოს, იგი შეზღუდული თავისუფალი აგენტი გახდება და რთულია მიზეზის დანახვა, რომლის გამოც, პეისერსი მის შენარჩუნებას გადაწყვეტს“.

შეგახსენებთ, რომ „პეისერსის“ რიგებში ქართველს მცირე სათამაშო დრო ეძლევა. მან „ინდიანას“ რიგებში ბოლოს 21 იანვარს ითამაშა და „დენვერის" წინააღმდეგ პარკეტზე თითქმის შვიდი წუთი გაატარა. გოგას მეტოქის კალათისთვის არ შეუტევია, 3 მოხსნა მიითვალა და 1 დაკარგვა ჰქონდა. Yahoo-ს ცნობით, „ინდიანა“ მზადაა, ბითაძის წარმომადგენლებთან ერთად იმუშაოს და მას ახალი კლუბი მოუძებნოს.

მიმდინარე რეგულარულში გოგა პარკეტზე საშუალოდ 8:43 წუთს ატარებს, მისი სტატისტიკა კი ასეთია - 3.2 ქულა, 2 მოხსნა, 0.4 ასისტი, 0.2 ჩაჭრა, 0.7 დაფარება. მის გუნდს რაც შეეხება, „პეისერსს“ 25 მოგება და 30 წაგება აქვს და აღმოსავლეთ კონფერენციის მე-12 პოზიციას იკავებს.