„საქართველოსთან მარცხი კატასტროფული შედეგი იყო“ - უელსის ნაკრების ექს-თავკაცი

უელსის რაგბის ნაკრების ყოფილმა მთავარმა მწვრთნელმა, უეინ პივაკმა საქართველოსთან გამართულ შეხვედრაზე ისაუბრა. პივაკმა „დრაკონების“ თავკაცის პოსტიდან დათხოვნის შემდეგ, დუმილი დაარღვია და განაცხადა, რომ „ბორჯღალოსნებთან“ მარცხი კატასტროფული შედეგი იყო.

„ძალიან იმედგაცრუებული ვარ. სიმართლე გითხრათ, საქართველოსთან მატჩის შემდეგ, ვხვდებოდი, რომ ჩემთვის ყველაფერი დასრულებული იყო. ბორჯღალოსნებთან დაპირისპირება გახლდათ მატჩი, რომელიც უელსის ნაკრებს არასდროს უნდა წაეგო. სპორტში ყველაზე მნიშვნელოვანი შედეგია და ჩვენ სასურველი შედეგი ვერ დავაფიქსირეთ.

არ მეგონა, საქართველო ასე თუ ითამაშებდა, რის გამოც, პასუხისმგებლობა მაკისრია. ბორჯღალოსნებთან არ უნდა წაგვეგო, თუმცა ახლა სხვა გზა არ გვაქვს და ამ მარცხს ისტორიიდან ვერ წავშლით. საქართველო პროგრესის გზაზეა და ეს მატჩი მათთვის მნიშვნელოვანი იყო, თუმცა ჩვენც იგივე მდგომარეობაში ვიყავით. აღნიშნული შეხვედრა ადასტურებს, რომ თუ სათანადო მოსამზადებელი პერიოდი არ გაგივლია და სწორი დამოკიდებულება არ გაქვს, კატასტროფულ შედეგებს შეეჩეხები და საქართველოსთან სწორედ ეს მოხდა. ბორჯღალოსნებთან გამართული შეხვედრა ნამდვილად იყო მატჩი, რომლის დავიწყებაც მინდა“.

შეგახსენებთ, რომ საქართველოს ნაკრებმა უელსი 13:12 დაამარცხა. „დრაკონებთან“ მოპოვებული გამარჯვების შემდეგ, „ბორჯღალოსნები“ რეიტინგში 1 საფეხურით დაწინაურდნენ და მე-13 ადგილზე გადავიდნენ.