რამოსი რონალდუსთან ერთად - ალ-ნასრის გრანდიოზული გეგმა

ბოლო კვირების განმავლობაში ევროპულ პრესაში აქტიურად იწერება კრიშტიანუ რონალდუს ალ-ნასრში შესაძლო გადასვლის შესახებ. გავრცელებული ინფორმაციით, საუდის არაბეთის კლუბი პორტუგალიელს 5-წლიან კონტრაქტს და წელიწადში 200 მილიონ ევროს სთავაზობს.

როგორც ჩანს, ალ-ნასრის მიზანია, რომ უახლოეს წლებში მსოფლიოს მასშტაბით ცნობილი ფეხბურთელების მოყვანით უდიდესი საფეხბურთო პროექტი გახდეს. ესპანური სააგენტო Marca-ს ინფორმაციით, არაბები რონალდუსთან ერთად მადრიდის „რეალის“ ყოფილი კაპიტნისა და ამჟამად პსჟ-ის მცველის, სერხიო რამოსის დამატებასაც ეცდებიან.

სააგენტოს ცნობით, რამოსს პსჟ-სთან კონტრაქტი 2023 წლის ზაფხულში ეწურება და „ალ-ნასრიც“ მის დამატებას ივლისში უფასოდ შეეცდება. თუმცა, მანამდე მთავარი პრიორიტეტი რონალდუს თემაა. Marca-ს მტკიცებით, საუდის არაბეთის ჩემპიონატში რონალდუს ტრანსფერის გაოფიციალურებას იანვრის დასაწყისში უნდა ველოდოთ.

მათივე თქმით, 37 წლის ფეხბურთელის გარემოცვა რიადში იმყოფებოდა და კლუბის ხელმძღვანელებთან ხელშეკრულების დეტალებს აგვარებდა.